WASHINGTON DC – Idale lePhalamende namuhla likhangelelwe ukuhluza udaba lokuthi kumele kwehliswe imali ehlawulwa yilabo abancintisa kukhetho oluzayo yini kumbe hatshi kulandela ukulaywa kwalo yinkantolo yeConstitutional Court.
Umthetho uthi labo abancintisa kukhetho lukaMongameli kumele babhadale inkulungwane zamadola aseMelika ezingamatshumi amabili, US$20,000 kuthi abancintisa kolwamalunga ePhalamende bona kumele babhadale inkulungwane, US$1,000, okuyimali amabandla amanengi athi akalayo.
Loludaba lukhwezwe emthethwandaba weConstitutional Court (ConCourt) ngumkhokheli webandla leNationalists Alliance Party uMnu Divine Mhambi Hove esithi iZimbabwe Electoral Commission (ZEC) kumele iphoqwe ukwehlisa limali.
Idale leConCourt lilaye iPhalamende ngeviki edluleyo ukuthi kusiyafika ngoLwesihlanu kuliviki kumele ibisiluhluze loludaba yavumelana ukuthi limali iyaqhubeka injalo njengokuhlelwa kwayo yini kumbe iyehliswa.
Umphathintambo obona ngezemithetho uMnu Ziyambi Ziyambi utshele iphephandaba leChronicle ukuthi ikomidi yePhalamende ebona ngezemithetho, eyeParliamentary Legal Committee yiyo ezaphatha loludaba namuhla.
Lokhu kwenzakala ngesikhathi abazancintisa kukhetho sebeqalisile ukubhalisa edale leNomination Court phambilini kosuku olukhulu oluhleliweyo, mhlaka 21 kulinyanga.
Isikhulumeli sebandla leMDC uMnu Witness Dube utshele umsakazo weStudio 7 ukuthi abebandla lakhe labo sebeqalisile ukubhalisa, kodwa uthi bakhala ngemali ehlawulwayo.
Your browser doesn’t support HTML5
Ingxoxo loMnu Witness Dube