WASHINGTON DC -- Ekhuluma emhlanganweni awenze labohlangothi lwabasakhulayo besifazana bebandla lakhe, olweYoung Women 4 ED, inengi labo abazavota okwakuqala kukhetho lwalonyaka, owenzelwe enkundleni eyeMucheke, eMasvingo, uMnangagwa uthe amazwe angentshonalanga akwenza ngenjongo yokungcolisa ibizo lakhe ukuthi angatholi usekelo kukhetho ngokwenza konke okusemandleni awo ukuwisa isisindo sedola le Zimbabwe nxa liqathaniswa leleMelika okubangela ukukhuphuka kwentengo yempahla lokudla ezitolo ukuze uzulu amsole angamvoteli.
U Mnangagwa ukhuthaze abasakhulayo ukuthi bavote ngokuthula ngoba ibandla lakhe selikhulile lingafuni okodlame, ngoba abamabandla aphikisayho noma bangaze benzeni bona bazanqoba kuphela kukhetho.
Kodwake umsekeli kanobhala obona ngezokhetho ebandleni eliphikisayo, ele CCC, uNkosikazi Ellen Shiriyedenga, uyalandula umlandu owetheswa ibandla lakhe nguMangagwa, esithi okubulala ilizwe yikwehluleka kombuso weZanu PF ekulandeleni imithetho yokulondoloza ukuthula, umnotho welizwe lenkohlakalo.
"Bona abeZanu PF loMongameli Mnangagwa yibo abasembusweni. Nxa inotho itshaphazwa yibo not thina. AbeCCC bangenaphi kuleyo ndaba?" kutsho uNkosikazi Shiriyedenga.
Your browser doesn’t support HTML5
Udaba lomhlangano weZanu PF eMasvingo