BULAWAYO - Inengi lezizalwane zeZimbabwe ezalethwa kwele Bhilithane ukuzosebenza kwezempilakahle ziqhatshwa ngabameli babaqhatshi amaRecruitment Agencies likhala ezimathonsi ngemva kokubhekana lobunzima bokuswela imisebenzi.
Abangela misebenzi sokuzamele babuyele eZimbabwe. Uhulumende weBhilithane wavumela abaqhatshi laba ukuthi bangabisa izisebenzi ezivela eZimbabwe nxa kulomsebenzi phansi kohlelo olweCertificate of Sponsorship, ebavumela ukusebenza kwezempilakahle kulelozwe.
Eminyakeni emibili edluleyo abantu eZimbabwe baphakame njengesavunguzane belubhekisa eNgilandi besiyafuna umsebenzi. Abaqhatshi abanengi bebebhadalisa imali ezesabekayo kulabo abafuna ukuya kulelo lizwe, okwenza abanengi babanjwe ngamandla ukuthengisa izifuyo, imota lezindlu ukuthi bathole imali yokubhadala lababantu abaqhatshayo.
UViola Moyo ngomunye wababhadala inkulungwane ezithile zamapounds ukuthi afinyelele ukuya eNgilandi.
“Ngababhadala 5,500 pounds ukuthi bangilungisele isponsor ngafika ngasebenza kodwa bebethatha half of umholo wami bethi yi-agency fee. Khathesi akusela msebenzi and ngisebenza ama-hours amalutshwana angenelisi lokubhadala irent. Ngisiza la umama wathengisa her 2 roomed house ePumula and l don't know ngizayenzani even if l go back home."
UNkosazana Thabile Mabhena uthi babuhlungu ngento abayenzwe ngama agencies.
"Umuntu akutshele ngokuthi kala ma-hours wena ku-contract kuyabe kubhaliwe ukuthi kumele usebenze amahola ayi-40. Umuntu adlale ngawe angakunikezi ama-hours amanengi. Yindaba? Kudabukisa inhliziyo ngoba abantu bahlukumezekile."
Omunye ole-agency yakhe yokuqhatsha izisebenzi edolobheni leLeeds, uNkosikazi Phathi Hadebe, uthi abanye bakhe bayona.
"Ngingomunye wabaphathi. Ngaletha abantu. I’m sorry to say kunzima kimi ngoba abanye uyambona umuntu ehluphekile ukuthi you are the only hope. Ngikhuluma kunje bakhona ababili abasemaphepheni ababotshiweyo abaphuma kithi abaletha abantu bengela misebenzi. Igreediness abanengi bazadilikelwa lijele."
Omunye wabaqhatshi, uMnu Zibusiso Mabuza, oweCrystal Care edolobheni leLondon, uzonde kakhulu ngokwenziwa ngamanye ama-recruitment agencies.
"Uthatheleni umuntu ukuthi azodubeka kanje ngoba ufuna ukuthatha imali yeHome Office lapha ubulokhe udlalisa ilokhuzeni uthatha imali ebantwini bonalaba abasekhaya bekubhadala abo5,000 ukuthi azohlala esitaladini umntanabantu engasebenzi. Akulunganga lokhu. Khathesi selisiwonisele thina esenza izinto kuhle. Selisiwonisele kubi."
UMnu. Thamsanqa Mpofu, ohlala eBradford, uthi abanye abaqhatshi laba bagcwele inkohlakalo.
"Abantu basekhaya bayathatha abantwana ekhaya babalethe lapha kungela misebenzi bababhadilise izimali babagcwalise bangabanikezi imisebenzi. Abantwana sebeze bebuyela emakhaya abantu bangakhona ngabantu abale corruption sebethatha besenza izinto eziphuma emthethweni. Sebemotshela abantu abanengi abantu abalama companies asebenza kahle. Khangela thina njengoba sinje siyawathola wonala amalokhuzeni kodwa ngeke size silethe abantu ma imisebenzi ingekho."
Omela amalungelo oluntu njalo enguEquality, Diversity & Inclusion Officer esebenzela idolobho leBrighton, uMnu. Ndabezinhle Gulu Sibanda, uxhwayisa abase Zimbabwe ukuthi baqaphele oguluva base Bhilithane
"Abafowethu labodadewethu labantwabethu betshiya inkinga zeZimbabwe and in so doing abanye sebesuke bathengisa izindlu, abanye basuke bathengisa imizi abanye bathethe yonke the whole savings abalazo empilweni zabo balubhekisa ngangapha bekwazi ukuthi ngizafika ngapha ngisebenze gadalala ngikwanise ukubhadala izikwelede zabantu. Yikuthi alubana lizakwenza la amadecision khathesi okuquphuna izimuli lisizangapha lidingisise liphenyisise lenze lokhu okuthiwa ngesilungu bathi bona yi-due diligence."
UNkosazana Sihle Dube ligqwetha elisebenza edolobheni leManchester. Uthi labo abangasela mIsebenzi bayakhona ukudinga eminye imIsebenzi kwezinye indawo behlukane lama recruitment agencies abo.
"Bengahlala bengayenzi lutho, iHome Office eventually iyakhansila ama-Visa abo and bayacina bebuyela ekhaya. So what they can do is khonalapha eUK akhona amaAgency irole yangakhona angatshintsha kiyo ekulist yemisebenzi edingakala eUK they have to again update iHome Office ibatshele ukuthi hayi thina sesifuna ukutshintsha from irole leyi to irole leyi."
Ugatsha lwendaba zasekhaya kweleBhilithane iHome Office, yalile ukukhuluma leStudio 7 kodwa bathe bazabopha bonke abephula umthetho. Inhlanganiso yezempilakahle emhlabeni jikelele eyeWorld Health Organisation, yatshela eleBhilithane ukuthi lingasaqhatshi izisebenzi ezivela eZimbabwe lamanye amazwe ukuze lilondoloze ezempilakahle kulelo.
Okwamanje kumnyama phambili kumnyama emuva kuzizalwane zeZimbabwe ezifuna ukuyasebenza kwele Bhilithane.
SEE ALSO:
Bathwele Nzima Abadabuka eZimbabwe Abathenjiswa Izulu Lomhlaba eBhilithane