JOHANNESBURG - Bajabule kakhulu abalama Zimbabwe Exemption Permits kwele South Africa ngemva kokuba ugatsha lwendaba zasekhaya seluthe sebengahlala kuze kuyephela uMpalakazi hatshi ngoNhlangula njengalokhu obelukutshilo.
Embikweni owethulwe izolo ebusuku ngumphathintambo wogatsha lwendaba zasekhaya kweleSouth Africa umnumnzana Aaron Motsoaledi, uthi wengeze isikhathi sala amapermit ukuze abeZimbabwe laba babe lethuba elaneleyo lokufaka ezicelo zamanye amapermit.
Uphe njalo umlayezo wokuthi akufuzanga abalamapermit la babotshwe ngesizatho zokuthi amapermit abo asephelelwe yisikhathi.
Ngalesi sikhathi bayavunyelwa njalo ukuphuma lokungena kweleSouth Africa. Sekungokwesithathu ilanga lokuxotshwa kwabeZimbabwe laba lilokhu lidluliselwa phambili.
Umgcinisihlalo wenhlanganiso yeZimbabwe Community in South Africa, uMnumnzana Ngqabutho Mabhena, uthi bemukela ngezandla zombili ukwengezwa kwamalanga lokhu.
“Kube sobala kithi ukuthi idepartment of Home Affairs kumbe umnyango wendaba zasekhaya ubungeke ufinyelele ukuthi kuthi kufika u30 June ube usulungisile konke ngoba labo abafaka izikhalazo zabo kumele bafake isikhalazo salokho okuthiwa yiwaiver ekuqaliseni. Sithe sikhangela sabona ukuthi kabenelisi ukuthi bathathe abantu abanengi ukwenzela ukuthi abantu ba submite ama applications abo.
UNkosazana Victress Mathuthu, Umgcinisihlalo wenhlanganiso elwela amalungelo abomama kwele South Africa eyeZim Imbokodo, uthi vele besekudingeka ukuthi lesi sikhathi sengezwe.
“Ekufakeni izicelo lapha besekusiba lengqinamba ezinengi ezinjengokuthi abantu bebekwazi ukuthi bagcwalise amafomu abo ebulenjini, bahambe bayebhadala kodwa kube nzima ukuthi bathole amalanga okuthi bathole lesikhathi lapho okufanele bayefaka khona izicelo. So besebehlezinje begcwalisile amafomu kodwa kuswelakale isikhathi sokuthi bayefaka izicelo zabo.”
Kodwa isizalwane sakwele South Africa, uMnumnzana Freeman Bhengu, osanda kuqoqa ukutshengisela obekukhuthaza ukuxotshwa kwabaselizweni ngokungekho emthethweni, uthi kabavumelani ngitsho lakancane lokwengezwa kwesikhathi samapermit lawa.
“Sibona sengathi ugovernment wethu uyasidelela. Sibona engathi uHome Affairs wethu akaboni ukuthi la eSouth Africa i-unemployment inengi. For them ukuthi ba extende la amaZEP kutsho khona ukuthi abanandaba nama South Africans ba prefeya ama Zimbabweans. Sibuhlungu, siyadabuka ukuthi this decision has been taken. Sisamele icourt then after that we will be challenging it laye uHome Affairs sizomchallenger regarding the extension of amaZEPs for another 6 months.”
Ukwengezwa kwesikhathi sala mapermit kwenzeka ngesikhathi lapho izizalwane zeZimbabwe lezi zilindele isinqumo somthethwandaba ngemva kokuba inhlanganiso ezimbalwa ziye emthethwandaba ukuyaphikisana lesinqumo sokwesulwa kwamapermit la.
Ingcitshi kwezemithetho, uMnumnzana Vusumuzi Sibanda, uthi loba umthethwandaba ungathi abeZimbabwe laba abahambe, akusoke kuguqule isinqumo sokwengeza isikhathi samapermit la.
“Uma inkantolo ingapha isinqumo sokuthi ungqongqoshe ubeqondile kulokhu akwenzileyo ukuthi angangezeleli kumbe ukuvuselela amaZEP kutsho khona ukuthi isinqumo sikangqongqoshe yiso esesizoqhubekake njengoba esethe hayi hlalani kuze kufike u31 December 2023.Uma inkantolo ingabuya njalo inikeze isikhathi esehlukile esedlula u31 December, ibeke eceleni isinqumo esasenziwe ngungqongqoshe esokuqala, kutsho ukuthi nalokho yikhona osekuzoqhubekake kube yikhona okulandelwayo ngoba izinqumo zikangqongqoshe ziyabe sezesuliwe zafakwa eceleni.”
Kusenjalo, kulamanye amabhanga aseqalile ukubhalela abeZimbabwe laba ebazisa ukuthi amapermit abo azaphelelwa yisikhathi ngoMpalakazi kantike amabhanga afanayo abesebahlupha ngokuthi amapermit abo aphelelwa yisikhathi kuyonale inyanga.
Abaqatshi labo sebemukele leli nyathelo besithi ukungazi ukuthi kuzakwenzakalani ekupheleni kwenyanga besekusenza ukuthi bengazi loba kufanele baqatshe ezinye izisebenzi kumbe hatshi.
Kusenjalo elinye lamagqwetha abemela abeZimbabwe laba odabeni lokuthi amapermit abo angesulwa, uMnumnzana Simba Chitando, uthi bayalemukela leli nyathelo lobanje bekhangelele ukuthi umthethwandaba uphe isinqumo esizakwenza abeZimbabwe laba baphiwe ilungelo lokuhlala ngokugcweleyo hatshi, okwesikhatshana.
AbeZimbabwe laba sekukanengi besithi abafisi ukubuyela emuva njengoba besekuleminyaka elitshumi besebenzisa amapermit la kwazise besebakhe lemizi lendlela zokuziphilisa kweleSouth Africa. Abanyeke besithi eZimbabwe lapho okuthiwa bayekhona akulamisebenzi.
Kulamaqembu njalo angafuni abokuza kwele South Africa asethembise ukuthi azaphikisana lalesi sinqumo emthethwendaba.
SEE ALSO:
Udaba Esilwethulelwe NguThuso Khumalo