HARARE - Abantu abanengi sebekhuluma ngomthetho obunjwayo oweCriminal Law Codification and Reform Amendment Bill, owaziwa ngokuthi yiPatriotic Bill, olakho ukuvumela uhulumende ukuba akhahlameze uzulu mahlayana.
Akwaziwa ukuba idale leSenate lizakwenza njani ngomthetho lo obunjwayo, oleziqa ezivumela ukujeziswa kabuhlungu kwabakhulumisana labakwanye amazwe okungekho emthethweni, abathethisa uhulumende labenza okucatshangelwa ukuba kwehlisa isithunzi selizwe.
Abaphikisayo bathi akulunganga okwenziwa nguhulumende kaMongameli Emmerson Mnangagwa, okuthiwa wesaba ukuthi uzulu uzavotela amabandla aphikisayo hatshi eleZanu PF. Omunye wamalunga edale lephalamende okukhomithi yezokulungiswa kwemithetho, uMnumzana Daniel Molokele, okubandla leCCC, uthi kungamzwisa ubuhlungu kakhulu idale leSenate lingapasisa iPatriotic Bill.
UMnu. Prince Dubeko Sibanda, laye olilunga ledale lephalamende phansi kwebanda leCCC, uthi bekumele kulungiswe imithetho yokuqhutshwa kokhetho hatshi iPatriotic Bill.
Kodwa okhokhela amalunga edale lephalamende ekubandla leZanu PF, uMnumzana Pupurai Togarepi, uthi akaboni okubi ngeBill le.
Ingapasiswa yiSenate iBill le, izahanjiswa kuMnangagwa, okubikwa ukuba uzayisayina ibengumthetho welizwe.
Kusenjalo, ikhomishini ebona ngokwenziwa ngabezindaba eyeZimbabwe Media Commission, ithi kumele kuhlonitshwe intathelizindaba ngesikhathi kusenziwa ukhetho eZimbabwe. Ikhomishini le ithi kumele intathelizindaba lazo ziziphathe kahle ngesikhathi sokhetho oluzayo. UMnu. Godwin Phiri, unobhala wenhlanganiso elawula umsebenzi wentathelizindaba eyeZimbabwe Media Commission, uthi kunengi abafisa ukuba kwenziwe ngesikhathi sokhetho.
Isiphathamandla senhlanganiso ebona ngokwenziwa zintathelizindaba eyeMedia Institute of Southern Africa, uMnu. Nqaba Matshazi, uthi lanxa isimo kwezokuhlukunyezwa kwentathelizindaba sekunganeno, bamelele ukubona ukuthi bazaphathwa njani ngesikhathi sokhetho oluzayo.
Isikhulumeli samapholisa eZimbabwe, uAssistant Commissioner Paul Nyathi, uthi ukuxoxisana yiyo indlela kuphela engaluqeda loludubo lokungezwani phakathi kwenhlangothi ezitshiyeneyo lentathelizindaba.
AbeZMC baveze njalo ukuba sebelobe ugwalo olulawula ukusebenza kwentathelizindaba ngales’isikhathi sokhetho olulesihloko esithi ‘Election Reporting and Peace Journalism Manual’.