BULAWAYO -- Iqembu leChicken Inn seliphaphe layahlala phezu kwengalane yemiklomelo kusigaba seCastle Lager Premier Soccer League ngemva kokunqoba elikwenze eleBlack Rhinos nge 1 ka nya emdlalweni oqhutshelwe enkundleni yeLuveve namhla emini.
Ohlohlele iqembu leChicken Inn nguMichael Charamba ngehlandla lesibili elomdlalo njalo limpumela itshiye abafana beChicken Inn belemiklomelo engamatshumi amabili lanye ngemva kwemidlalo elitshumi lambili.
Kweminye imidlalo edlalwe namhla iqembu leCranborne Bullets linqobe eleCaps United nge 2 ka 1 emdlalweni obusenkundleni yeNational Sports Stadium kuthi iqembu leSheasham libe ngutshiki lobhanqa 0 ka 0 lele Herentals ngaseBata Stadium enkabazwe.
Imidlalo yePSL iqhubekela phambili kusasa ngeSonto njalo iqembu leHighlanders lizemukela eleBulawayo Chiefs ngaseBarbourfields emdlalweni okhangelelwe ngabalandeli bomdlalo wenguqu abanengi.
Umqeqetshi weqembu leBulawayo Chiefs uLizwe Sweswe uthi abafana bakhe kuzamele bengabi ngamagwala njengoba iqembu leHighlanders lilabalandeli abanengi.
“Ngumdlalo ozakuba mkhulu ngoba iqembu leHighlanders lilabalandeli abanengi njalo ngokunye okubaphathisa kakhulu. Abanye abafana bethu abazake bedlale leqembu elilabalandeli abanengi kodwa sizamile ukuthi sibatshele ukuthi kabahambe bayedlala ngoba ibhola liyafana,” kutsho uSweswe.
Abadlali bamaqembu womabili bavele bayazana ngoba inengi labo bekhulele edolobheni lakoBulawayo kodwa umdlali weqembu leHighlanders uElshamar Farasi uthi lokho bona kabasoze bekufake engqondweni zabo.
“Yebo kambe ngumdlalo wamaqembu aphuma edolobheni linye kodwa thina akusikhathazi lokho ngoba esikuhlosileyo yikusebenza kanzima enkundleni sithole yonke imiklomelo,” kutsho uFarasi.
Kweminye imidlalo ezadlalwa kusasa iqembu leGreen Fuel lizemukela eleFC Platinum ngaseGibbo, iqembu leDynamos FC lizangqikilana leleZPC Kariba ngaseNational Sports Stadium, kuthi iqembu leHwange lizadlala leleManica Diamonds ngaseColliery.
NgoMvulo iqembu leYadah lizadibana leleNgezi Platinum Stars ngaseNational Sports Stadium.
Your browser doesn’t support HTML5
Ezemidlalo siloJoseph Njanji