BULAWAYO -- Lonyaka iZimbabwe yenelisa iminyaka engamatshumi amane-40 kwaba lombhuqazwe oweGukurahundi eMaNdebeleni leNkabazwe lapho okwabulawa khona abantu abedlula inkulungwane ezingamatshumi amabili, libutho lesizwe iFifth Brigade, kusehlakalo esenzakala ilizwe lisanda kuthola uzibuse ngomnyaka ka1983. Abasila kulo umbhuqazwe, abezombusazwe lenkokheli zomdabu bakhuluma kabanzi ngombhuqazwe weGukurahundi.
Imuli ezabona abazali bedutshulwa betshiswa kodwa bona basinda kumbhuqazwe weGukurahundi balandisa kabuhlungu ngokulahlekelwa kwabo bethi impilo yahle yatsheka bakhula kubuhlungu.
UNkosazana Patricia Dlamini uthi unina wasila ekutshisweni ngoba wayesenelisa ukukhuluma ulimi lwamasotsha aweFifth Brigade.
“Ngimi lapha loba ngasila kumbhuqazwe weGukurahundi kodwa inhliziyo yami lokhe ingakapholi ngabe kuyavuma umongameli Mnangagwa abuye la ngimbuze imibuzo mhlawumbe ngingaphola ngoba uxolo ngesiga engasibona kulo umuzi asipholi emoyeni Wami.”
Ekhuluma esemhlanganweni oweWorld Economic Forum, elenyanga ezimbili engine embusweni, uMongameli Emmerson Mnangagwa wathi yena uzimisele ukuhlangana labasinda kumbhuqazwe weGukurahundi bakhulumisane.
"Ngalesosikhathi ngangingumphathintambo obona ngezomvikela labacuphi ekhaya, asitsho ukuthi okwenzakalayo kumele kulahlwe. Labo ababhekana lombhuqazwe weGukurahundi bengathi ngizekhulumisana labo ngizakuya."
UMnu Mbuso Fuzwayo unobhala jikelele wenhlanganiso elwela amalungelo oluntu, eye Ibhetshu LikaZulu, uthi lanxa isikhathi sesiside kwenzakala inkemenkeme yalumbhuqazwe akula okuthe kwenziwa ukuthoba amanxeba.
"Kulusizi ukuba ngemva kweminyaka engu40 kwabalombhuqazwe weGukurahundi uhulumende wezimbabwe abantu abahlukumezwayo lelizwe jikelele kabalinikwa ithuba lokuba bakhulume ngokwenzakalayo, lokuthi kutshiwe ukuba kwenziweni, sibonile ummeli wedale lephalamende exotshwa edale ngemva kokukhuluma ngodaba lolu kodwa umongameli Mnangagwa ethi abantu bakhulume bekhululekile kodwa amalunga edale bexotshwa lenkokheli zomdabu zihlangana kungela okuphumayo kudlalwa ngabantu lesizwe kuyadanisa."
UNduna Khulumani Mathema waseGwanda ngomunye othi wathinteka ngalumbuqazwe kodwa njengenkokheli zomdabu abaphiwanga amandla okuthi luphathwe njani loludaba.
“Thina ngakithi sadlula ngaphakathi kwakho. Udaba lombhuqazwe alulungiswa ngumalwenzwa esasembuswe sekungathi sesiphambuka njengelizwe. Kulenkokheli zomdabu ezaya e Switzerland besiyafunda ukuba luphathe njani udaba lombhuqazwe kodwa ekuphendukeni kwabo sekusenza ukubanxele indlela okumele siphathe ngayo hatshi evamileyo eyaziwa ngumhlaba. Amandla akhona kodwa asiwaphiwanga ukuphatha loludaba.”
Inkokheli zomdabu, inhlanganiso ezilwela amalungelo oluntu, amabandla okholo lezombusazwe, lozulu jikelele bathi bakhathazekile ngendlela uhulumende aphatha ngayo umbhuqazwe weGukurahundi.
Okwamanje uhulumende sewapha inkokheli zomdabu amandla ukuba ziphathe umsebenzi wokukhumisana umlotha ngombuqazwe lo, kodwa uzulu lenkokheli zomdabu azivumelani lakho. Engena embusweni eminyakeni emihlanu edlulo uMongameli Emmerson wayethembise ukuba udaba lolu uzalulungisisa kodwa sekuyiwa njalo kolunye ukhetho lokhu lungakalungisiswa.
Your browser doesn’t support HTML5
Udaba lokunanzwa kweminyaka engu40 kwesiga seGukururahundi siluphiwa nguAnnahstacia Ndlovu