VICTORIA FALLS - Inhlanganiso yeChamber of Mines Zimbabwe isungule umhlangano wayo walonyaka ngoLwesithathu eVictoria Falls okulengcwethi zaloluhlangothi ezedlula amakhulu amathathu ezithe gwaqa kulindawo zizama ukubonisana ngendlela ezingenza ilizwe leZimbabwe lithuthuke ngezomnotho waphansi.
Lumhlangano uvulwe ngumqondisi kahulumende kuhlangothi lweMines and Mining Development, uMnumzana Walter Chitando, okhuthaze kakhulu lezinkampani ukuba kufuze zisebenze ngokuxhasana njalo zimanyane kwezokwemba, ikakhulu iLithium athi iqukethe inotho enengi kakhulu elizweni leli nxa ingenjiwa njalo ithengiswe ngokusemthethweni kwamanye amazwe.
iLithium le esetshenziswa ukwenza ama battery ezimota ezihamba ngogetsi labomakhalekhukhwini akukudala ilizwe leli iyitholile endaweni ezifana leBikita leKamativi njalo kulethemba lokuba yiyo engaguqula isimo sezinga lezomnotho kuleli ngezigidi zomnotho eziqukethwe yiLithium le.
Abanye abasemhlanganweni weZimbabwe Chamber of Mines
“Ngakho kubalulekile ukuba njengabembi beLithium limanyane kubalisela lalabo abaqalisayo njengohulumende, asisoze silitshele ukuba kenze lokhu ubani lokhu, okuqakathekileyo yikuthi sibambane njalo sibelenhloso eqondileyo ngoba kungehlula lokho kusiyabamba umnyaka ka 2026 sizafaka inhlawulo enzima kini.”
Umnumzana Colin Chibafa, umholi weChamber of Mines, ubike ukuba lumhlangano oqhutshwa ngaphansi kwendikimba ethi “Creating Growth Enablers for the Mining Industry”, uzahlafuna ngodaba lokuphumelelisa ezakwombiwa kwe Lithium le, ubuye njalo wethule abatsha abafisa ukubambana leleZimbabwe ekwembiweni kwayo.
Umhlangano weZimbabwe Chamber of Mines
“Silethemba ukuba lokhu esizakuhlafuna lapha, silethulele khona njalo kuzakwenza ukuba ukuba kwazakale ukuba simengaphi ngeze Lithium njalo sizakuba labaqeqetshi abalolwazi ngalokhu abazaxoxixana lathi ukuze sibezingcitshi kumhlaba wonke ngezokwenziwa kama battery eLithium.”
Kusenjalo, uNkosikazi Nicole Johnson, umqondisi wohlangothi lwePolitical and Economic Section kuEmbassy yeMelika eZimbabwe obenikeza isifundo ngaphansi kwendikimba yeMinerals Security Partnerships, ukhuthaze laba kanye lohulumende ukuba ukuze lezinhloso ziphumelele, kufuze izakhamizi zakuleyondawo zifakwe phambili kungakaqalwa umsebenzi wokwemba njalo inkohlakalo lobusela bunqatshelwe.
“Lokhu kugoqela ukuphatha kuhle imvelo, ukumanyana labanikazi balezi ndawo, njalo ukungabambi ngamandla ukungena endaweni zabo lisemba ngokungelasivumelwano kanye lokubona ukuba laba elemba endaweni zabo aliyenzi inkohlakalo lokungabaphakamisi ngezomnotho wabo.”
UMnumzana Chibafa ubike ukuba ezokwembiwa ngomnyaka ophelileyo zilethe kungcebethu yelizwe izigidi zemali efika ku US$ 5.6 billion, le eyabanengi kulanyakenye.
Uthi kulethemba ukuba lonyaka uhlangothi lolu luzakhweza inani ngokwetshumi lengxenye- 10.4 percent, uthi kodwa anduba kuphumelele lokhu, uhulumende kufuze akhangele izisekelo zombuso ezigoqela ukulungiswa kwe Mines and Minerals Act, Indigenization and Economic Empowerment, iMinerals Development Police, Local Content Policy kanye lezokusetshenziswa kwemali yeMelika leyakulelilizwe.
SEE ALSO:
Udaba Esilwethulelwe NguNokuthaba Dlamini