HWANGE - Izakhamizi ezonga abantu abagula imikhuhlane etshiyeneyo esabelweni seMatabelaland North zikhala ngokuswela imali yokuthenga imithi kanye lamaphilisi.
Abacubungula ezempilakahle bathi zinengi izigulane ezingatholi amaphilisi ngemfanelo. Kubika uNokuthaba Dlamini …
Abahlaziya ngempilo kazulu abeZimbabwe Vulnerability Assessment Committee kuphenyo lwabo lweRural Livelihoods Committee Assessment Report lomnyaka ophelileyo, bethule impumela ethi izizalwane ezigoqela inani elifika kusilinganiso sokungamatshumi amathathu lasithupha ekhulwini - 36 percent kusabelo lesi zilegcikwane leHIV/AIDs njalo kwande imikhuhlane yokugula ingqondo, izifo zenhliziyo kanye letshukela.
Abagulayo laba babikwa bengenelisi ukuthola amaphilisi ngenxa yokuswelakala kwawo. Izakhamizi zesabelo lesi zithi okwenza kubenzima kakhulu lapho besondla izigulane lezi yikuba kabatholi uxhaso kuhulumende ukuze benelise ukunakekela laba abalemikhuhlane engavamanga ukusilwa nje.
UNkosikazi Elizabeth Maphosa, oleminyaka engamatshumi ayisitshiyagalombili - 80 owakhele esigabeni seVulindlela eHwange, ulohlupho lokonga indodana yakhe, eyazalwa ngomnyaka ka1987, egula ingqondo.
Umfelokazi lo uthi usethanyele isibaya sonke ethengisa izifuyo ukuze atholele indodana yakhe amaphilisi ngemva kokuhlaselwa yisifo lesi esaqala ngomnyaka ka2019, qede samemuka umsebenzi wakhe wobungcitshi ekubazeni. Uthi isiyehlule imizamo yokuthola usizo ezibhedlela ngoba babatshela ukuba lawo maphilisi lejekiseni kakukho.
“Bamtshela ukuthi kawasekho. Imbuzi zazikhona esibayeni lenkomo ngangilezingu 13, zonke azisekho ngamaphilisi wonala enyangazonke ngoba kakufuzanga awaswele. Singezwa kuthi segamul’umuntu kumbe segamule inkomo yomuntu ngoba engazenzi.”
Esinye njalo isakhamuzi seKachechete Ward, uNkosikazi Christine Ndlovu, olondoloza umzukulu wakhe olijaha elileminyaka elitshumi lanhlanu ogogekileyo emzimbeni, uthi labo balohlupho lokunakelela lo ngesimo sendlala kanye lokungatholi amaphilisi ngemfanelo ngoba kwezinye izikhathi uyawaphiwa, kumbe kuthiwe kawakhokhele.
UNkosikazi Christine Ndlovu
“Wayehamba kodwa khathesi kasenelisi kukhuluma, okwala ukudla kwesinye isikhathi ngenza ukumfunza ngoba kenelisi ukudla, kodwa amaphilisi yiwo angani aluhlupho kakhulu ngoba ngelanga kufuze athole ukunathiswa amathathu nsukuzonke lokudla lonyaka kasitholanga lutho emasimini, yindlala.”
UMnumzana Bongani Maphosa, usobhuku esigabeni lesi, uyalufakaza udubo olubhekwe yizakhamizi ezinengi. Ukhale njalo ngokubakhatshana kwezibhedlela okwenza abanye becine bedlula emhlabeni ngokuswela usizo.
“Ukhona umfana kobhudi oyisigoga, laye uwathola ngokuthenga ngoba esibhedlela kabamniki mahala, sikhaliswa njalo yikuthi ukudla esilakho kakweneli njalo lohlupho lokuthi amaphilisi uyabe usiyathenga.”
UMnumzana Givemeagain Moyo, ukhansila wakulesisabelo, usola kakhulu uhulumende ngokunganakekeli abantu laba. Uthi uhlupho lolu lubonwa phose nguzulu wonke ompofu.
“Uhulumende kalethe limithi emakilinika ngoba banengi abanjalo. Abantu khathesi bayahlaselwa yindlala, sikhuluma kunje izakhamizi kazivunanga kuhle ngenxa yesomiso sedrought so abantu laba balohlupho lokuthi ngithenge amaphisi kumbe ukudla.”
Abe Zimvac kuphenyo lwabo babika ukuba isabelo seMatabeleland North silentandane kanye labafelokazi abanengi okwedlula ezinye.
Kulizwe lonke, abogatsha lweUnited Nations International Children’s Emergency Fund babika ukuba inani labantu abedlula kancane izigidi ezine - 4.3 million, kugoqela abantwana abadinga usizo lwezempilakahle ngokuphangisa.
UDokotela Admire Kuretu, okhokhela uhlangothi lwezempilakahle esabelweni lesi, kenelisanga ukukhuluma ngodaba lolu lomsakazo weStudio 7 esithi ubambekile ngoba usemhlanganweni kwathi isikhulumeli sohlangothi lukahulumende lwezempilakahle, uMnumzana Donald Mujiri, ubengaphenduli umakhalekhukhwini wakhe. Kaphendulanga umlayezo esimthumele wona kuWhatsApp.