HARARE - Amalunga ebandla leZanu PF atshele umsakazo weStudio 7 ukuba ukhetho lulakho ukwenziwa mhlaka 30 Ncwabakazi lonyaka.
Kubikwa ukuba uMongameli Emmerson Mnangagwa bekumele ethule umbiko lo kugwalo lwe-exraordinary gazettee emini yantambama.
Abantu bamelele ngamehlo abomvu ukuzwa ukuba uMnangagwa uzakuthini ngosuku lokhetho olukhulu oluzaqhutshwa lonyaka. Iziphathamandla zikahulumende esikhulume lazo, ezigoqela uNkosikazi Virginia Mabhiza, zithe kazilalwazi lokuthi uMnangagwa uzakwethula nini usuku lokhetho.
UMnangagwa utshele abantu eBinga ngempelaviki ukuba uzakwethula usuku lokhetho ngoMvulo.
Sehlulekile ukukhuluma ngodaba lolu loMnu. George Charamba, isikhulumeli sika Mnangagwa, uMnu. Ziyambi Ziyambi, ophethe uhlangothi lukahulumende lwezemithetho, labanye akade bengaphenduli omakhalekhukhwini.
Kuvame ukuba umongameli ethule usuku lokhetho kugwalo lwe-extraordinary gazette.
Amabandla atshiyeneyo athi asemelele okuzakwethulwa nguMnangagwa.
UMnu. Ostallos Siziba, umsekeli wesikhulumeli sebandla leCitizens Coalition for Change, uthi sebelungiselele ukhetho oluzayo.
UMnu. Witness Dube, obona ngokwethulwa kwemibiko kubandla leMDC-T, uthi labo sebemelele ukhetho lolu.
Okubandla leZanu PF, uMnu. Mabutho Moyo, uthi sebelumelele usuku lokhetho njalo sebelulungiselele ukhetho lolu.
UMnu. Benard Mpofu, isakhamuzi seHarare, uthi usemelele ukuvota kukhetho oluzayo.
Kungethulwa usuku lokuvota, amabandla asezawala ukukhankasela ukhetho lolu elizweni lonke jikelele.
Kudaba olufanayo, ibandla leMDC-T, elikhokhelwa nguMnu. Douglas Mwonzora, lithi lizazama ngazo zonke indlela ukudlelana kahle lentathelizindaba. UMwonzora wethule lokhu namuhla ngesikhathi ekhuluma lentathelizindaba eHarare.
Uthi ukuze kube lokhetho olukhululekileyo elizweni kumele intathelizindaba zenze umsebenzi wazo zingathathi icele loba ukusekela amabandla ezombusazwe. Lokhu kugcizelelwe nguNkosikazi Lindani Moyo, omele iHarare edale lephalamande phansi kwe-proportional representation, ekucele labesifazana.
UNkosikazi Moyo uthi ibandla leMDC T lamanye amabandla kawatholi amathuba afana lamabandla amakhulu emisakazweni kazulu. Uthi lokhu kumele kulungiswe.
UMnu. Perfect Hlongwane, unobhala jikelele wenhlanganiso yeZimbabwe Union of Journalists, uthi intathelizindaba zizazama ngamandla wonke ukudlelana kahle lebandla leli lamanye ezombusazwe.
Umhlangano lo owenzelwe emawofisini kaMwonzora eHarare, ubuqoqwe yinhlanganiso eyeMedia Alliance of Zimbabwe. Ngeviki ephelileyo inhlanganiso le yenze umhlangano ofanayo leziphathamandla zebandla leZanu PF leze Citizens Coalition for Change, ekhokhelwa nguMnu. Nelson Chamisa.