BULAWAYO - Inengi lithi ikomishini ebona ngezokhetho eyeZimbabwe Electoral Commission ipheke imboza kulandela ukungatholakali kwamanye amagama abantu ababhalisa ukuvota kugwalo lwabavotayo olweVoters’ Roll.
Kulabanye abalezikhundla eziphezulu kumabandla aphikisayo abangekho kugwalo loli.
IZEC ivulele uzulu ukuthi ayehlola ukuthi amabizo abo akhona ngaphansi kohlelo lweVoters’ Roll Inspection, olwenziwa ilizwe lonke endaweni ezitshineyo okuvotelwa khona. Abanengi amagama abo akekho. Bekuxokozela emawofisini eZEC koBulawayo amakhulu lamakhulu abantu bezonde okwamagama bezobuza ukuthi kungani amagama abo engekho kuVoters’ Roll. UMnu. Amos Sibanda ngomunye walabo abaswele amagama abo kugwalo lolu.
"Ngithe ngiyakhangela ibizo lami eBurnside filling station lapho engivele ngovotela khona kwathiwa kalisekho khonaphana selise Rio le egaralajini. ERio ngabona kungafika 10kms."
Ugogo uMaNkala elakhe ibizo balisusile avotela khona eMganwini.
"Namuhla ngisusiwe kuB, ibizo lami alikho eSenzangakhona, banengi bayakhala amabizo atshintshiwe, asisakwazi singogogo ukuthi ngingaka ngizadinga udondolo ngisiya kuma khonale kuthiwa sengifakwe ku25 khonale eNketa"
Omela isigaba seBulawayo Central edale lephalamende, uNkosikazi Nicola Watson, laye uswele igama lakhe kuluhlu lwamabizo abavotayo olweVoters Roll.
"Ngithe ngisiyahlola igama lami izolo lalamuhla alikho kuvoters Roll kodwa ngihlezi ngivota ngokhetho lonke kusukela ngo 1988. Okumangalisayo engihlala labo endlini yami abizo abo akhona.
Isiphathamandla seCitizens Coaltion for Change, uSenator Coltart, laye ubambe owangaphansi ngoba igama lakhe kalikho kugwalo lolu.
"Namuhla ekuseni ngihambe mina mathupha ngaya lapho engivotela ngafika ngaswela ibizo lami, ngazama ngefoni 265 ngaliswela, ngasengisiya emahofisini eZEC ngathola luxokozela angaikwazi kumbe ibizo lami lizacina liphumile yini"
UMnu. Archiebald Chiponda, isikhulumeli sebandla leZanu PF koBulawayo, uthi banengi abasekeli bebandla leZanu PF abalamagama angekho kugwalo lolu.
"Abasekeli bebandla labo abaswele amagama abo, uhlupho lolu alwehlelanga abasekeli bamabandla aphilisayo kodwa wonke umuntu weZimbabwe.”
UMnu. Innocent Ncube, obonga ngokuqhutshwa kwenhlelo zekhomishini yeZEC koBulawayo, uchaza ngezikhalazo ahlangana lazo ezivela kuzulu.
"Kubeble category 1 ukuthi imispost yakhe utshintshile waphiwa le address engayisiyo. What happened lokhuyaka ngeke ngikuchasisele angikwazi. Omunye abe lemispost maintains the same address kodwa ke abesisithi umispostiwe lwana kungenzakala ukuthi nxa e within that area as mispost per say u affectwe yi-delimitation entsha."
Uyaphambili uNcube esithi amabandla ezombusazwe wawatshela ngemngcele emitsha.
"Ngesikhathi siyenza i-explained to the political parties ngababiza ama political parties ngabatshela. Nxa kuyikuthi uafffectwa yili movement entsha akusela ngeyinye indlela you have to live with it in your new boundary esiyabe sikufake khona.
Lanxa kulemboza eZEC, uMongameli Emmerson Mnangagwa ukhangelelwe ukuba uzakwethulela uzulu usuku lokuvota. Igqwetha eliyingcwethu yesisekelo sombuso, uMnu. Matshobana Ncube, uchaza ukuthi ukhetho lungabanini.
"Upresident angasazisa isizwe ngosuku lwe elections kufuze ukuthi within 14 to 21 days inomination court ihlale all over Zimbabwe to receive amabizo alabo abafuna ukuthi bancintise ekhwethweni within 30-63 days kufuze ukuthi kwenziwe ukhetho so ukhetho nxa sikhangele i-delimitation report ke ekhona, nxa izasetshenziswa kutsho ukuthi ukhetho kufuze lwenziwe anytime after 18 or 19 August.”
Kusenjalo, umqondisi omkhulu wezincwadi zokuzalwa lezithupha, uMnu. Henry Machiri, uthi ukuthatha izithupha lama birth certificates kuqhubekela phambili eZimbabwe loba kulungiselelwa ukhetho oluzayo.
“Ugatsha lokuthathisa uzulu izithupha luqhubekela phambili lulanda abantu bonke lubahathisa incwadi abazifunayo lokhu kwasukela ekuqaleni kuka Nkwenkwezi kuze kuyecina ekupheleni kukaNtulikazi.”
Ukuhlola amagama alabo ababhalisa ukuvota kukhangelelwe ukuba kuzagqitshwa kunsukwana ezilandelayo.