WASHINGTON DC - Abebandla elibusayo leZanu PF leliphikisayo eleCCC bajikelana amazwi aqatha phezu kokuwa kwedola leZimbabwe osekulethele uzulu ubunzima obumangalisayo.
Intengo yezinto phose zonke ikhwele kakhulu kuliviki kulandela ukuwa kwedola kaluleli nxa liqathaniswa leleMelika.
Emkambo wensitha idola leMelika elilodwa selithengwa ngamadola aseZimbabwe edlula inkulungwane ezine, 4,000.
Ibandla leCCC lithi lokhu kuveza sobala ukuthi uhulumende weZanu PF usehlulekile; ngakho kumele abantu bamsuse embusweni kukhetho oluzayo.
“Ama-measures ayekhulunywa nguVP wethu uBiti ukuthi ama-austerity measures asetshenziswa yiZanu kasebenzi ngoba ama-indicators abawasebenzisayo kaqondanga,” kutsho ilunga leCCC eMelika uMnu Tim Muringai.
“[Yikho nje] okwakhathesi sesibona idola leZimbabwe lisiwa njalo lentengo lazo zikhuphuka.”
Kodwa abeZanu PF bathi umnotho udilizwa yizitha ngabomu kanti njalo bathi iCCC iyahabaza ngokuthi idola leZimbabwe alisathengi lutho.
“When it comes to umkhonomi, kuyabe kufuna abantu bahlale phansi babonisane bendawonye, kodwa esikobonayo yikuthi abantu abahambi kanye-kanye, abanye badonsa besiyale abanye besiya le,” kutsho ilunga leZanu PF koBulawayo uMnu Admire Masikati.
Your browser doesn’t support HTML5
Ingxoxo loMnu Tim Muringai loMnu Admire Masikati