BULAWAYO..................
Ikomishini ebona ngokuqhutshwa kokhetho eye Zimbabwe Electoral Commission -ZEC, iyethule umbiko , othi labo ababhalisela ukuvota kukhetho lwalonyaka sebelakho ukuyahlola amagama abo kuluhlu lweVoters Roll endaweni ezehlukeneyo zelizweni kusukela Ngomgqibelo ngayonale iviki kusiyafika umhlaka 31 Nkwenkwezi.
Lokhu kwamukelwe ngemibono ehlukeneyo ngabamabandla ezombusazwe, inhlanganiso zokulondolozwa kwamalungelo oluntu lozulu jikelele.
UMongameli weRepublic Party of Zimbabwe uMnu Kwanele Hlabangana ngomunye wabamukele uhlelo lokuhlola ugwalo olwe Voters Roll.
"Uhlelo luqondile kodwa alwenziwe ngendlela ibandla lethu selilungele ukhetho njalo lemali yokuyabhalisela ukuvota sengilayo kodwa uhlupho yikuthi kukhetho olwedlule asizange saphiwa iVoters roll loba sasibhadele imali yokungena kukhetho."
UMnunzana Patrick Ndlovu ilunga leZAPU uthi kuqakathekile ukuti kube lendawo ezinengi zokuyahlola lolu gwalo.
"Uhlelo siyalwamukela luqondile kodwa phela alwenziwe yonke indawo abeZEC bayefinyelela labasemakhaya abahamba imango emide ukuze bazi ukuba bazabe bevotela ngaphi kwendawo."
Ilunga leMthwakazi Republic Party uMnu Patson Xaba uyabasola abe ZEC ngendlela abaqhuba lumsebenzi.
"Uhlelo olwenzakala manje lubeliphoso elikhulu kuZEC ngoba abantu lokhe bengakabikwazi idelimitation report entsha bazahlolanjani ukuba bavotelangaphi uma belokhe bengazi izigaba zabo eizntsha."
Obona ngokuqhutshwa kwenhlelo koBulawayo, ebandleni leCitizens Coalition for Change uNkosazana Sithabile Moyo ukhuthaza amalunga ukuthi baye ngobunengi ukuyahlola iVoters Roll.
"Ibandla leCCC selilungele ukhetho lobanje singela lwazi oluphelelelyo ngenhlelo zokhetho kodwa sikhuthaza abantu ukuba bayemathupha ukuyahlola amabizo abo ukuze behlale besazi lapho abazavotela khona kukhetho oluzayo njalo asikabilolwazi olujulileyo ngedelimitation report."
Voters Roll inspection
UMnu Admire Masikati obona ngokuqondiswa kwenhlelo kwabatsha kubandla leZANU-PF, okhangelele ukumela ibandla lakhe eMzilikazi –Mpopoma, kukhetho lokudinga amalunga edale lephalamende laye ukhuthaza abatsha ukuthi basukumele phezulu baye hlola lolu luhlu.
"Uhlelo lweVoters roll inspection luqondile siyalwamukela ngakho ngikhuthaza abatsha ukuba bayehlola amagama abo njalo njengebandla besingakabi lolwazi olupheleleyo ngemingcele emitsha eyedelimitation report."
AbeZEC bazise ukuba uzulu ulakho njalo untinya inombolo ezithi *265# kumakhalekhukhwini wakhe, abesefaka inombolo zesithupha lebizo ukuze umuntu abone ukuthi igama lakhe likhona na, kugwalo olweVoters Roll.
Imizamo yokukhulumisana leziphathamandla zeZEC koBulawayo ayiphumelelanga lamhlanje ngoba besithi basemhlanganweni wokuhlomisa abazabe bekumsebenzi wokuphathisa abeza ukuzohlola iVoters Role koBulawayo lobanje uzulu ethi akajabuli ngokungabi logwalo oluveza ukuphawulwa kakutsha kwemingcele ezasebenza kukhetho oluzayo, iDelimitation Report.
I-ZEC ayikenzi njalo isimemezelo senani labantu asebethe benelisa ukubhalisela ukuvota okumele kube sekusaziwa nguzulu jikelele ngalesi sikhathi.
Your browser doesn’t support HTML5
Udaba lokuhlola iVoters Roll siluphiwa nguAnnahstacia Ndlovu