VICTORIA FALLS - Abesezempilakahle kugatsha lukahulumende olweMinistry of Health and Child Care Development sebesungule olunye njalo uhlelo lokuthontisela abantwana umuthi wokuvikela ubhubhane lwePolio kulizwe lonke jikelele.
Uhlelo lolu lwesithathu, olusungulwe ngomnyaka ophelileyo kulandela ukumemetheka komkhuhlane lo emazweni angcelezelane leZimbabwe agoqela iMozambique leMalawi, lukhangelelwe ukuthi luzaqhubeka kusukela namhlanje kusiyamba uLwesine iviki yonale.
Umkhankaso lo owenzelwa ezibhedlela, emakilinika, emavinkilini kanye lezinye indawo uzulu avamise khona, ujonge ukufinyelela inani labantwana eliyizigidi lengxenye -2.5 million kusukela kozelweyo kusiya kwabaleminyaka engaphansi kwemihlanu, ngenhloso yokunanzelela ukuba yonke owesintwana uyavikeleka kubhubane lolu..
Umqondisi obona ngokuqhutshwa komsebenzi eHwange uFungai Musinani uveze ukuba bakhangelele ukuthontisela abangafika phose abangamatshumi amabili ekhulwini ngemva kokunanzelela ububi bomkhuhlane lo odala ukuba umntwana angawugula agogeke kumbe asweleke.
Ubike ukuthi izindawo zempilakahle ezingamatshumi amathathu lasitshiyagalolunye sezihlonyisiwe ngale imithi lolwazi kugoqela amaphandleni.
Banika umntwana umuthi wokunqabela umkhuhlane we-polio
“Kodwa sinye ngasinye isibhedlela silamaqembu amabili, amanye athontisela ekuleyo ndawo, amanye njalo akhankasa engena emizini enzima ukuyifinyelela.”
UDokotela Heron Bhudinyana Dube ongu District Health Medical Officer weNkayi ubike ukuba loluhlelo lwamukelwe kuhle, njalo labo bajonge ukuthontisela inani eliphezulu kulandela ukuhlonyiswa kwamamakilinika lezibhedlela kuzigaba zonke ngenhloso yokwephula umango ebazalini.
“Lokhu sikutsho ngoba kuqala nxa isigaba sasilemizi engamatshumi amabili alabantwana, sasithontisela phose bonke mhlawumbe ababili bayabe behambile kodwa labo silethemba lokuba bayathontiselwa lapho abayabe behambe khona.”
UMnumzana Elias Nyoni uthe yena ukubona kuqakathekile ukuthi labesilisa bephatheke kumkhankaso le ngemva kokutshiywa ngumfowabo kweleBinga owayeswele ukuvikelwa ezalwa.
“Mina ngokwami ngilobufakazi ngomkhuhlane lo kudala so nxa kuzaba yinto esizayitshiyela omama kuphela, kwesinye isikhathi umama uyabe engalaso leso sikhathi besekumhlupha kusasa yikho lami ngibone kuqakathekile ukuthi ngibuye lapha sibavikele ngoba lumkhuhlane uyingozi kakhulu.”
UNkosikazi Masunko Moyo osemutsha, laye obeze labantwabakhe ababili esibhedlela se Victoria Falls uncome kakhulu njalo lezinhlelo ngoba ziyavikela abantwana emkhuhlaneni.
“Lanxa esezohlaba umntwana uthola umzimba wakhe uhlala uvikelekile, uyabe ehealthy ngamajekiseni la ayabe ehlatshwa lokuthontisela kwakhona.”
Uhlelo lolu uhulumende uluphathiswa zinhlanganiso zomanyano wamazwe omhlaba ezibona ngezempilakahle kazulu ezigoqela iWorld Health Organisation.
Ugatsha lolu lubika ukuba ngemva kokumemetheka kokhuhlane lo owe Wild Polio Virus emazweni agoqela iMozambique le Malawi,kudingeka ukuba abantwana abafika izigidi ezingamatshumi amathathu lantathu- 33 miilion kufuze livikelwe eAfrica kusiyabamba umnyaka ka 2025.
Lokhu kuhlose ukududula uhlupho lokugogeka kumbe ukufa ebantwaneni ngomnyaka ka 2030.