GABORONE - EleZimbabwe kanye le leBotswana athi ayasuthiseka ngempumela yemizamo yokulwisana lokuntshontshwa kwezifuyo emzini esemngceleni ephakathi kwamazwe womabili.
Amazwe womabili azithola ephakathi kwengxaki kulandela ukulwisana okwakuqhamuka njalo nje emzini esemngceleni ngenxa yokuntshotshwa kwezifuyo.
Abalimi kweleBotswana babesethesa abadabuka eZimbabwe, umlandu wokungena bezontshontsha izifuyo, ikakhulu inkomo.
AbeZimbabwe bona babekhala ngomthetho kahulumende weBotswana wokudubula inkomo ezeqa umngcele.
Kodwa ngemva kwemihlangano eyenziwa phakathi kukamongameli Emmerson Mnangagwa lomunye wakhe wakweleBotswana, umongameli Mokgweetsi Masisi, kubikwa sekulobubelo.
Umongameli Masisi ekhuluma lentathelizindaba eGaborone, uthi kuyakhanya ukuthi imizamo yabo isiletha impumela.
“Siyajabula ukuthi njengamazwe womabili, sesibona sekulontshintsho phezu kwemizamo yethu yokulwisana lokuntshontshwa kwezifuyo ikakhulu kulandela ukuhlangana kwenkokheli yethu.”
Abalimi emhlubulweni weGwanda, abafana lomnunzana Rodwell Moyo, bathi udubo lokuntshontshwa kwenkomo kade selulubi kakhulu.
“Besuludubo olukhulu ngokweba kwezifuyo, abantu bezithatha phakathi kwamazwe womabili, loludubo kade selulubi kakhulu. Abantu kade bethatha inkomo eBotswana bezozithengisa ngapha.”
UMoyo uthi kuyajabulisa ukuthi udaba lolu selwehlile ngemva kwemizamo eyenziwa ngamazwe womabili.
“Kuhle okwenziwa yinkokheli okutshengisa ukuthi njengabomakhelwane kumele siphile njani.”
Ukuntshontshwa kwezifuyo kwabona ezinye izakhamizi kucele leBotswana litshiya imizi lisithi liyesaba amasela wona afika ebusuku ehlomile.
Amazwe womabili, kuyikusebenzelana kwabogatsha lwesipholisa kanye lamasotsha, afaka inkamba ezitshiyeneyo emngceleni, kukanti kulamacebo okusebenzisa imitshina yama drone ukulwisana laloludubo njalo kwabunjwa amaqula aphuma phakathi kwezakhamizi, ancedisana labomthetho ukuhamba hamba emngceleni.