JOHANNESBURG - Abadabuka eZimbabwe abahlala kwele South Africa bathi bamangaliswa ngebenhlanganiso yeOperation Dudula labanye abathi bazatshengisela emigwaqweni kunsukwana ezilandelayo besithi kumele abangela maphepha aqondileyo bephume bephele elizweni leli.
Kulombiko obhodabhoda emphakathini owethulwe yiOperation Dudula labanye abathi sebekhathele ngabantu bokuza abahlala kwele South Africa okungekho emthethweni.
Bathi bazatshengisela emigwaqweni kunsukwana ezilandalayo besola ukuba eleSouth Africa kumele lilalele abakufisayo. Umkhokheli wenhlanganiso elwela amalungelo abesifazana eyeZim Imbokodo, uNkosazana Victress Mathuthu, uthi okwethusayo yikuthi sebekubone kanengi ukutshengisela okufana lalokhu kucina sekuchaphakela ebantwini bonke ababuya kwamanye amazwe lalabo abaselizweni ngokusemthethweni.
“Sixwayisa ukuthi abantu bangasithathi kancane lesi sixwayiso. Siyazi ukuthi abantu bazathi vele sihleli sixwayiswa njalonje kuthiwe kasiphume sihambe. Sithi kibo mama bengasithathi kancane lesi sixwayiso. Kababone ukuthi ngalelo langa umuntu uvikelekile lezingane. Engathi umuntu engaxwaya kakhulu indawo ezingathi zilabantu abayisixuku. Umuntu akambe ngokuqaphela loba esiya emsebenzini abantu bahambe beqaphe eqolo njengonwabu.”
Isikhulumeli senhlanganiso yeZimbabwe Community in South Africa, uMnumnzana Bongani Mkhwananzi, laye uthi bakhathazekile ngalesi sixwayiso.
“Ma kuyikuthi babona kunabantu abangenawo amaphepha abangene elizweni laseSouth Africa ngokungekho emthethweni zikhona ingatsha zomthetho ezimelana lalokho. Kumele izikhalazo zabo baziqondise kulezo ngatsha, zibe yizo ezikhangelana lalolu daba. Lokhu okokuqondana nabantu ngqo bethi bona bavala lelizwe akuncedi muntu.”
Inhlanganiso ezithi zizatshengisela phandle kwamawofisi kaMongameli Cyril Ramaphosa zigoqela eyeOperation Dudula, Sisonke People’s Forum lamabandla ezombusazwe asanda kubunjwa. Bathi eleSouth Africa seligcwele ngakho kayiselandayo yokugcina abantu abaselizweni ngokungekho emthethweni. Obona ngokuqoqwa kwalokhu kutshengisela njalo ebona ngokuhanjiswa kwenhlelo zenhlanganiso yeSisonke People’s Forum, uMnumnzana Freeman Bhengu, uthi kusukela mhlaka 1 Nhlangula bazalubhekisa emawofisini kaRamaphosa eUnion Buildings njalo bafuna into yonke ime mpo elizweni kukhulunywe ngokuthi kwenziwani ngabantu bokuza abaselizweni ngokungekho emthethweni.
“More than 35 organisations zaseSouth Africa from grassroot, NPOs, NGOs, political parties we will be demanding ukuthi uCyril Ramaphosa comes out and answer us ukuthi ama foreigners la agcwele la eSouth Africa uzoyenzani ngawo ngoba sesimthumele amamemorandum aba manengi.Sizobe sihlezi lapho, asisuki, asiyindawo until uCyril Ramaphosa aphume azositshela ukuthi uzoyenza njani indaba yamaforeigners agcwele la eSouth Africa.”
UBhengu uthi kababuyeli emuva ngokuthi wonke oselizweni ngokungekho emthethweni akaphume aphele.
“Asitsho ukuthi wonke amaforeigners. Sithi amaforeigners a illegal eSouth Africa from Zimbabwe, Nigeria, Pakistan, China, India, Europe from America sifuna ukuthi bonke bahambe. Abantu abangekho emthethweni ukuthi babe la eSouth Africa sifuna ukuthi baphume baphele la eSouth Africa.”
Sehlulekile ukukhuluma lesikhulumeli sika Ramaphosa obengaphenduli umakhalekhukhwini. Lobanje uhulumende ubengakaphawuli ngalo umlayezo, ngesikhathi inhlanganiso yeOperation Dudula ihamba ixotsha abantu bokuza emisebenzini lezibhedlela, uMongameli Ramaphosa wathi akukho emthethweni lokhu kodwa kufanele kubikelwe amapholisa kube yiwo athatha inyathelo nxa kukhona oselizweni owephule umthetho.
Lesi sixwayiso siza ngesikhathi izizalwane zeZimbabwe eziphose zifike izinkulungwane ezingamakhulu amabili ezilamapermit eZimbabwe Exemption Permits sezitshelwe ukuthi ziphume ziphele elizweni nxa zingaphumelelenga ukuthola olunye uhlobo lwamapermit.
Kusenjalo, izizalwane zeZimbabwe ikakhulu ezihlala elokitshini leHammanskraal duze lePretoria zithi zikhathazekile ngemva kokuqhamuka komkhuhlane wecholera osubulele abantu abedlula itshumi kuleyo ndawo. Bathi balokwesabela ukuthi lumkhuhlane ungangena edolobheno lePretoria ucine ususabalele ilizwe lonke.
SEE ALSO:
Udaba Esilwethulelwe NguThuso Khumalo