WASHINGTON DC - Izakhamizi zePlumtree ezigabeni ezigoqela koMbimba, eJutjume, koNdolwane lakoMakhulela zithi impilo zazo zisengozini ngenxa yezilwane esezigxile impande kulezindawo njalo eseziqede izifuyo.
Zithi abogatsha lukahulumende olubona ngokulondolozwa kwemvelo kanye lenyamazana zasendle kumele baphuthume basuse izilwane lezi zingakabulali abantu.
"Izilwane zibhokile lapha sesiphelelwe zinkomo, kusukela koMbimba kusiya le koMafa, ziphelile izifuyo zethu. Izifuyo ziphelile mpela hatshi into yokudlala, inkomo ikakhulu, inkomo," kutsho isakhamuzi sakoMbimba uMnu Moki Ncube.
Your browser doesn’t support HTML5
Ingxoxo loMnu Moki Ncube
Isikhulumeli sogatsha olubona ngezendle olweZimbabwe Parks and Wildlife Management Authority (ZimParks), uMnu Tinashe Farawo kaphendulanga imibuzo ayithunyelwe yiStudio 7.
Kodwa ukhansila wendawo uMnu Zuleki Nyathi yena uthe uhulumende sethumele abazingeli ukuyathungatha umkhondo wezilwane lezi ukuze zisuswe ebantwini zingakalimazi abantu.
Your browser doesn’t support HTML5
Ingxoxo loMnu Zukeli Nyathi
Ezinye izakhamizi zicabangela ukuthi izilwane lezi zalethwa ngomunye umlungu oqhuba inhlelo zokulondoloza inyamazana eMabhongane. Umsakazo weStudio 7 uxhumane laye umsolwa wathembisa ukuphendula imibuzo yethu.