BULAWAYO - Odokotela abelapha abadabuke indebe abakunhlanganiso yeOperation of Hope basesibhedlela seMpilo General Hospital lapho abelapha khona abalesimo lesi kungelanhlawulo.
Odokotela laba abafike eMpilo Hospital ngeviki ephelileyo kulandela ukubuyela kwele Melika kwabanye babo abafika kuqala, bathi baqhuba kahle uhlelo lolu.
UDokotela Jennifer Mora, okhokhela uhlelo lolu eZimbabwe, uthi sokulabantu abanengi abeyelatshwe elizweni leli kusukela ngomnyaka ka2006 besungula umsebenzi lo kungelanhlawulo. UDokotela Mora uthi baqala ukuhlinza abantwana abalendebe ezidabukileyo kusukela kwabalenyanga ezintathu zokuzalwa.
"Sesithe sahlola abantu abadlula amatshumi amahlanu njalo sikhangelele ukuhlinza amatshumi ayisikhombisa nilequla labodokotela. Kusenjalo sesenelise ukulunisa imitshina yokulalisa abantu ngemva kokuhlanganisa imali efika inkulungwane ezilitshumi lambili ukuze umsebenzi wethu ubelula."
UDokotela okhokhela uhlelo lokulungisa indebe zabantwana ezidabukileyo labanye abathungwe eeMpilo Hospital
UNkosikazi Sikhangele Mguni, okhokhela abongi labanye eMpilo Theater, uthi abantu ababhekane lohlupho lokudabuka indebe kumele befike esibhedlela lesi.
“Silabodokotela abahamba lenhlanganiso yeOperation of Hope Worldwide esuka kwele Amelika sebethe bahlola abantu njalo sebeqalile ukuhlinza abantu abalendebe lezilakalaka ezidabukileyo. Sikhuthaza labo abalohlupho lolu abangezwana ngohlelo ukuba baze esibhedlela bazothola usizo kungelambadalo."
UNkosikazi Gladys Muzambwa, osuka eBinga, uthi umntanakhe uAndile Muzambwa, obelendebe edabukileyo esanda kuhlinzwa, okwamanje ulungiswa ukudabuka phakathi komlomo.
Umama lengane esanda kwelatshwa
“Indodakazi yami seyahlinzwa indebe eyayidabukile sekungincedile ngoba ebephilanzima.Siyalubona uhlelo lolu ngoba akulamali esithe sayihlawula konke sakwenzelwe kungelambadalo. Lonyaka uzohlizwa ipalate ngikhuthaza abanye abazali abalodubo olufanayo ukuba labo baze bazothola usizo."
UNkosikazi Kerapesti Dube, osuka eGwanda, ubuye lendodakazi yakhe, uNathi Dube, owazalwa elesilakalaka lendebe edabuke kabili.
“Indodakazi yami yazalwa ilendebe edabuke kabili phezulu lesilakalaka esidabukileyo kodwa sewahlinzwa indebe kungela nhlawulo. Kuhlelo lwakhathesi sithenjiswe ukuba uzahlinzwa isilakalaka njalo lokhu sikwenzelwe sinahlawulanga lutho."
Esinye isakhamuzi seHwange, uNkosikazi Charity Mobe, olethe indodakazi yakhe, uGracious Maphosa, uthi umntanakhe ubemunya nzima.
“Indodakazi yami yazalwa 28 February 2022 ubele Cleft Palate saqala sabuya kwathiwa usasemncne lonyaka sibuyile benelisile ukumhlinza. Ubemunya nzima wayethi uma emunya ukudla kuphume ngamakhala ngitsho lochago.”
Isakhamuzi seHwange, uBeauty Ndlovu, uthi indodana yakhe uObedia Mukuni oleminyaka emine yokuzalwa, owake wahlinzwa icleft lip, lonyaka bamlungise ipalate.
“Kumnyaka odlule indodana yami yahlinzwa indebe lamuhla uhlinzwe ipalate ngakho ngikhuthaza abazali abalabantwana abalodubo engangilalo ukuba bangadeli abagijimele esibhedlela bazathola usizo ngoba owami umntwana uhlinziwe ngivela eTheater usemuhle.
Inhlanganiso yeOperation of Hope iqhuba umsebenzi ofanayo eZambia, Malawi lakwamanye amazwe.