VICTORIA FALLS - Uhlangothi lukahulumende olwezempilakahle luthi sokuqhamuke umkhuhlane wohudo esigabeni seBinga. Abantu abanengi esigabeni lesi bakhala ngokuswelakala kwezambuzi lamanzi ahlanzekileyo, besithi umkhuhlane lo ulakho ukumemetheka ngamandla.
Abezempilakahle bathi kulabantu abathathu abalahlaselwe ngumkhuhlane lo abalaliswe eBinga District Hospital. Abathathu laba, kubikwa ukuba ngabesifazana abadabuka emaphandleni agoqela iManjolo, okuyikho osekudala ukungahlaliseki kwabomongikazi balezindawo besesabela ukumemetheka kwaleligcikwane eselichitheke ilizwe lonke njalo labulala abantu abangamatshumi amabili lanhlanu - 25. UMnumzana Joel Gabuza, omele iBinga South edale lephalamende, uthi bazizwa belokwesaba kulandela ukulaliswa kwalaba abasalinde ukuhlolwa ngokujulileyo kusetshenziswa iRapid Diagonistic Test engekho kulesisibhedlela.
“Uhlupho esilalo yikuthi okusuye wonke umuntu olesambuzi njalo amnzi ahlanzekileyo ayahlupha ukutholakala ngenxa yokusweleka kwezulu, yilo udubo esilokwesabela ukuthi kungamemetheka masinya kungaqiniswa ukuthi sekukhona. Okunye njalo loba omongikazi bengazama ukufundisa izabelo ze Matabaleland North, akuvukeleki nxa abantu bengelazambuzi lamanzi.
“Kulezinto okufuze ukuthi ngabe uhulumende uyazenza ngoba lokhu akuqali okwe Cholera, sake sabalawo yabulala abantu abanengi eSaba, iBinga yonke kodwa uhulumende kazange athathe inyathetho lwamanzi lezambuzi.”
UNkosikazi Lekiwe Puthi, oyiVillage Health Care worker esigabeni seManzasiya eTinde, laye ugcizelele kumazwi kaGabuza.
“Uhlupho ngamanzi okuwatsha, banatha ndawonye lenkomo lezambuzi kakula okokuthi ngabe kuyaphumelela besakhele izambuzi ngoba lama Village Health Care akhona kawalazambuzi imizi ilengcekeza.”
Abacubungula ngehlalo zabantu abeZimbabwe Vulnerability Assessment Committee ngomnyaka ophelileyo bethule umbiko othi izakhamizi ezinengi esigabeni lesi kazilazambuzi. IBinga kwabikwa ukuthi inani elingamatshumi ayisithupha lasikhombisa lilenswelo kulokhu kulandela iLupane leTsholotsho.
Kodwa, ophethe isabelo seMatabeleland North, uMnu. Richard Moyo, ulandule ngezikhalazo lezi. Ubuye njalo wengeza ukuthi uhulumende usezihlomisile ukulwa laleligcikwane elizweni lonke jikelele.
“Besingakabizwa, kodwa umongameli ubesefakile imota se DDF (District Development Fund) lawe ZINWA (Zimbabwe Water Authority) abadrila amanzi kamongameli ukuthi abantu beBinga bethole amanzi ahlanzekileyo aphuma ngezimpompi esebenzisa isolar. Baphathekile, lokhu kwaqala emizini yezinduna sekungena ebantwini.”
EZimbabwe sekutholakale abantu abangamakhulu ayisitshiyagalolunye - 900 beligcikwane lohudo njalo kubikwa limemetheka kakhulu eManicaland, Matabeleland South kanye leHarare.
Ugatsha lwezempilakahle lubike njalo ukuthi abangamatshumi ayisikhombisa lanhlanu – 75 balalisiwe ezibhedlela endaweni ezitshiyeneyo.