VICTORIA FALLS - Abenhlanganiso ebona ngenhlelo zabangaboniyo, eyeCouncil for the Blind Zimbabwe, basungule uhlelo kuliviki lokubhoda eziqintini zesabelo seMatebeleland North, lapho abahamba benika uzulu usizo lokwelatshwa amehlo kungela mbadalo.
Uhlelo lolu luqhutshwe ngoLwesine eHwange.
AbeCouncil for the Blind Zimbabwe, babika ukuba sebenelise ukusiza abantu base Matebeleland North abedlula ikhulu selokhu besungule uhlelo lwabo lokwelapha imikhuhlane eyehlukeneyo ephathelane lamehlo, olweviki yonke.
UMnumzana uKhumbulani Ndlela, owenhlanganiso le, uthi umkhulane lo wamehlo usabalale kakhulu ebantwini asebekhulile, ngakho-ke babhoda ngezindawo ezehlukeneyo zesabelweni lesi beselapha njalo benika amangilazi kungela mbadalo.
Omunye wabahlolwe yinhlanganiso yeCouncil for the Blind
“Sinceda abadala ngodubo lwamehlo, siyananzelela ukuthi umkhuhlane wamehlo usuvamile kakhulu. Siyabuya sivela eCouncil for the blind sizobancedisa abadala kulezondawo esiyabe sizikhethile sakhulumisana labo njengoba nje besiseVictoria Falls sincedisa abadala kanye labantwana abalodubo lwamehlo. Siyabaphathisa kakhulu ufice ukuthi abanye bayabe bengelayo imali yokuthi babhadale inhlanganiso iyanika isandla sokuthi ibadonethele ibanike amaglass njalo lathengiswayo, athengiswa ngentengo ephansi ukuze benelise.”
UNdlela uthi ngoLwesihlanu bazabe bese Dete.
“Siyaphathisake kusukela eMatabeleland North eVictoria Falls, besilabo kusukela ngeMonday, lamuhla siseHwange, siyababona siphakathi kokuthi sibancedise labo kusasa sizabe sise Dete Clinic sisiyabanika uncedo ukuthi abantu bancedakale.”
Abanye abahlolwe yiCouncil for the Blind
Umqondisi weklinika le, uNkosikazi uSindiso Mhlanga, ubonge kakhulu okwenziwa ngabe Council for the Blind Zimbabwe esithi phezu komkhuhlane weCataract, kuvame njalo iDiabetic Retinopathy ebangelwa ngumkhuhlane wetshukela.
“Sikhangelele ukuthi nxa kuyikuthi umuntu angabuya kithi eClinic eMpumalanga thina asilawo ama services okunceda ngokwamehlo siyanika nje okuyimithi ikanti ke bona abe Council for the Blind balolwazi olujulileyo yokwelapha amehlo.”
Umongi labahlolwe yiCouncil for the Blind
Omunye walaba abathole usizo kuloluhlelo, uNkosikazi uLilian Nyampanemunda, uthi uhlupho lwamehlo lwamqala ngeminyaka eyadlulayo.
“Khona kuluncedo kithi njengoba bona bekoBulawayo thina siseHwange indleko zamatransport basephulela ngoba asisahambi sesinathola eduzane bayasihlola besebethatha amasize amehlo beseiyasilungisela subuya sebekunika amangilazi akho.”
AbeCouncil for the Blind Zimbabwe baveza ukuba umkhuhlane wamehlo ovame ukuhlasela abanengi ngoweCataract ebadaleni ngokukhula kuthi abasakhulayo bona bavame ukuhlaselwa yikutshisa kwelanga. Ezinye zendawo inhlanganiso le esizihambile eMatebeleland North zigoqela eTsholotsho, eSt. Luke's leLupane.
Ngomnyaka babika ukuba bahlola abantu abangaba zinkulungwane ezingamatshumi ayisithupha - 60,000, ezigabeni ezitsheyeneyo zelizwe hatshi eMatebeleland North kuphela. Bathi njalo benelisa ukuhlinza ezibhedlela abantu abedlula abazinkulungwane ezine – 4,500 ngomnyaka ophelileyo oka2022.