HARARE - Ibandla leCitizens Coalition for Change (CCC) libikwa lingakaqedi uhlelo lwalo lokudinga abazalimela kukhetho lokudinga amalunga edale lephalamende lawekhansili lanxa sokwedlule inyanga lokhu loluhlelo lwaqalayo.
Kubabanye abathi lokhu kuveza ukuba ibandla leli kakazimiseli ukungqikilana leZanu PF kukhetho oluzayo.
Lokhu kuza ngesikhathi uMongameli Emmerson Mnangagwa esebike ukuba akusensuku zatshwala engakethuli usuku lokuqhutshwa kokhetho.
AbeCCC baqale uhlelo lwabo lokudinga abazalimela ukhetho besithi abasoze benze ukhetho lwama primary elections kodwa uzulu nguye ozazikhethela ezabelwani labo afuna ukuthi abamele.
Ngesikhathi iqala ukhetho lolu CCC yathi luzaphela ngemva kwamaviki amathathu kodwa sekwedlule inyanga uhlelo lolu lwaqalayo kodwa kuze kube manje lokhu ingakethuli uluhlu lwamabizo alabo abazayimela kukhetho.
Ingcitshi zithi uhlelo lolu lukhanya soludale inking ezithile sokungasakhanyi ukuba ngubani ozamela iCCCi nanko ilizwe selisalelwe zinyanga ezimbili ukuthi ukhetho lwenziwe.
Eyinye yalezingcitshi, uMnu. Elisha Sithole, osebenza ekolitshini yeUniversity of Zimbabwe, efundisa izifundo zombusazwe uthi kusobala ukuba uhlelo lwabe CCC solubhekane lobunzima.
“IZANU PF itshengise ukuba yenze intando kazulu. Sebethethe isikhathi sabo balungisela ukuba lama primary elections avotelwa ngabantu. Lokhu kulakho ukuphazamisa CCC ngoba isikhathi asebesithethe sesingu.”
Lokhu kusekelwe ngeyinye incgitshi ecubungula ezombusazwe esebenza izimele uMnu Hebert Dube yena othi iCCC kwakumele yenze ukhetho lwama primary.
“Uhlelo lwabo lolu soluthethe isikhathi eside. Bengabanye ngabe bayakunanzelela ukuthi isikhathi sesihambile. Akusela sikhathi sokuba belokhe bephuza ukukhipha amabizo.”
Kodwa abeCCC bathi uzulu akumelanga ethuke ngoba sebekusibanga saphezulu njalo uluhlu lwamabizo alabo abazamela ibandla leli eseseduze ukwethulelwa umpakathi.
Lokhu kutshiwo ngumsekeli wesikhulumeli se bandla leli uMnu Felix Mafa.
“Ibandla le CCC lakutsho sobala ukuba lizathatha isikhathi salo ukulungiselela ukhetho. Labo abasola indlela esenza ngayo kabazwisisi ukuba ibandla lethu lisebenza njani. Kababekezel amabizo ayeza.”
UMnu. Admire Masikati, owebandla leZANU PF ozancintisa esihlalweni eseMpopoma-Mzilikazi, uthi ibandla lakhe lilungele ukhetho ukwedlula amabandla wonke elizweni.
“Lokhu kwenza ukuba njengabandla sense kube lentando kazulu. Abantu bazakuba lokubambana, ukuzwisisana lokumnayana ukuthi ilizwe liqhubekele phambili.”
Amabandla afana leZAPU, NCA, MDC-T lamanye lawo kawakethuli uluhlu lwamagama abazawamela kukhetho lwalonyaka besithi basadinga ukuba ngobani abafanele ukuncintisa.
UMnu. Herbert Chamuka, owebandla le Ideas Party of Democracy, uthi ibandla lakhe lizaqala ukukhetha inkokheli kumalanga alandelayo.
“Kuma primary elections sizahamba. Sesiqalisile ama preparations ethu. Ama MPS ethu lama khansili azavela abantu sizavota.”
Kuminyaka edluleyo abamandla aphikisayo avame ukukhonona esithi ukhetho aluqhutshwa ngendlela kodwa abanye bathi ukuqoqeka kwe ZANU PF kwenza inqobe ngezikhathi ezinengi.
Ingcitshi ezicubunula ezombusazwe zithi umbuzo omkhulu yikuba kambe lonyaka angalinqoba na ibandla le ZANU PF khona sekusele inyanga ezinlutshwane kungaziwa amabizo alabo abazancintisana lebandla leli.
Ekhuluma emathuneni aweHeroes Acre ngoMvulo, uMongameli Emmerson Mnangagwa wazise ukuba uzaphawula ilanga lokhetho kunsukwana ezilandelayo ekhuthaza uzulu ukuba avote ngokuthula.