Izakhamizi zemaphandleni emhlubulweni weMatebeleland South, ziveza imibono ehlukileyo ngokhetho oluzaqhutshwa lonyaka, lokudinga amalunga edale lephalamende inkokheli yamakhansili lomongameli. Inengi lithi lesabela ukuthi kuzaqhamuka udlame kusiya kukhetho njengalokhu okwenzakala nyakenye kukhetho lwama By-elections eziqintini zeMatobo leInsiza.
Lanxa ukhetho lusipha uzulu ithuba lokukhetha inkokheli afisa zimbuse, izakhamizi zemaphandleni ezinengi zithi zidlela evalweni ngoba eminyakeni edlule lolukhetho ludala udlame kanye lokungezwani ezigabeni okutshiya uzulu sekhombana ngeminwe ngemva kokhetho.
UNkosikazi Matilda Dube oyisakhamuzi seVokola uthi baba lokwesaba lapho kuqhutshwa ukhetho.
“Besilesifiso sokuthi ukhetho lolu kube lukhetho olungela dlame ngoba siyahlala singabethukileyo, sihlale singabagijimileyo omama yikho sebehluleka ukungena ezikhundleni ngobunengi.Omama bangabona ukuhlukunyezwa bahlehlela emuva kanti ke bekume kube yi50/50 omama labo bangene nxa usithi uyakhangela inani labomama lilutshwane.”
UMnu. Collen Ngwenya oyisakhamuzi seMatobo uthi kakholwa ukuthi ukhetho oluzayo luzaqhutshwa ngokuthula ngoba phambilini kuhlezi kuqhamuka udlame ngesikhathi sokhetho.
“IZanu PF ifuna ukuhlala embusweni kokuphela njengoba ileminyaka engu 43 ibusa kodwa kuleminyaka lokhu iphela amandla abantu bengayithanda ngenxa yezenzo zayo ezimbi kungakho ayisoze ivumele ukhetho olulokuthula ukuthi abantu bakhankase bekhululekile kumbe bavote bekhululekile ngoba iyakwazi ukuthi abantu bengavota ngokuthula izalahlekelwa ngumbuso.”
Lamazwi agcizelelwe nguUMnu Gabriel Moyo isakhamuzi seMawane eGwanda.
“UKhetho luzaqhutshwa kodwa ukuthula angikuboni kusenzakala ngoba nanku bona bayabhoda ngemizibekhankasa benza konke kodwa nganxanye ukwenza umhlangano loba emzini wakho kumele ubone ukuthi akulanto enhle enzakala kuwe ,uyatshaywa kumbe uyabanjwa, uyakhuluma umdala siyamuzwa kodwa asikakuboni ukuthula ukukhona.”
UNkosikazi Julieth Nkiwane oyisiphathamandla senhlanganiso emela amalungelo abomama lamantombazana uthi bafisa ukuthi ngabe ukhetho oluzayo luqhutshwa ngokuthulwa.
“Umthandazo wethu yikuthi ukhetho kaluqhutshwe kuhle , abantu bazihloniphe, abantu bahloniphane , abantu bathandane bahloniphe amalungelo abantu yokuthi ngulo lalo angazikhethela ibandla alifunayo, siyakubona okwenzakala eSudan siyafisa ukuthi kungafiki kulelizwe abafisa ukwenza udlakela baswele usekelo.”
IsikhulumelI sebandla eliphikisayo eleCitizens Coalition for Change esabelweni seZansi yemaNdebeleni uMnu. Ntando Ndlela uthi uzulu ulokwesaba ukuphatheka kunhlelo zebandla labo ngenxa yodlame oluhlezi lusiba khona kwezombangazwe.
“Nxa uhlangana labantu kumbe ubanxusa emhlanganweni inkulumo ekhona yikuthi yonke umuntu ukhathazekile ngokuvikeleka kwakho ukuthi iZanu PF ayisoke ibuye futhi isihlasele kungakho ukwesaba kukhona ebantwini kodwa njalo kulethemba lokuthi lolukhetho luzadala inguquko bakhiphe umbuso weZanu PF bafake umbuso omutsha okhokhelwa nguMnu. Nelson Chamisa yilo ithemba elenza abantu baqhubekele phambili befuna ukulwisana lesilwane lesi esiyiZanu PF.”
UMnu Malachi Nkomo oyisikhulumeli sebandla leZanu PF eZansi yemaNdebeleni uthi kuyize ukuthi ibandla lakhe linqoba kukhetho ngenxa yodlame.
“Ibandla leZanu PF libandla elikwaziyo ukuthi lilamalunga amangaki njalo sikhangela lepopulation ekhona siyabe sikwazi ukuthi sizanqoba njalo nje uMongameli welizwe lomsekeli wakhe baphume mngceke besithi abafuni dlakela abantu balelungelo lokuthi bazikhethele ubukhokheli abakufunayo akula ngeyinye indlela ongathi susebhokisini uthi usuke wayethuselwa abantu nxa bezadliwa abathule.”
UMongameli Emmerson Mnangagwa, ukhangelelwe ukuthi atsho ilanga okuzavotwa ngalo kungakapheli linyanga.
Your browser doesn’t support HTML5
Udaba lwezakhamizi zemaphandleni ezesabela udlakela kukhetho siluphiwa nguAlbert Ncube