WASHINGTON DC - Ukuchitheka komtshado wendodakazi kamuyi, uMnu Robert Mugabe, uBona, lobengumyeni wakhe uSimba Chikore sokuveze ukuthi ababili laba balenotho emangalisayo elakho ukungena kumabhiliyoni amadola aseMelika, okuyinto etshiye uzulu weZimbabwe ekhuza umhlola.
Amaphepha akhwezwe nguMnu Chikore enkantolo aveza ukuba ababili laba balamapulazi angamatshumi amabili lanye, 21, lendawo zokwakhela izindlu, ama-residential stands angamatshumi amabili lanhlanu, 25.
Phakathi kwamastanda lawa kulesinye esiseHelensvile esibiza US$1,8 million; esinye sibiza US$571,000 kuthi esinye ngeseUS$11 million. Le yimizekeliso nje emithathu kuphela.
UChikore loBona balezimota njalo ezinengi ezigoqela iRolls Royce ebiza inkulungwane zamadola eMelika ezingamakhulu phose ayisitshiyangalombili, US$790,000.
Umfanekiso wemota yohlobo lweRolls Royce Phantom
Ababili laba balomdadada wendlu yezinga laphezulu, i-mansion njalo eDubai ebiza izigidi zeMelika eziyizitshiyangalombili, US$8,1 million. Yonke linotho ingangena kubhiliyoni lamadola aseMelika.
Abanengi bathi ababili laba bathola linotho ngemisebenzi yenkohlakalo ngesikhathi kusabusa uMugabe.
UChikore uthi kafuni ukuthi umtshado wakhe loBona uchithwe, kodwa uthi nxa kusenzeka lokhu, kumele umthethwandaba ubabele linotho ngokulinganayo.
Igqwetha lakhe uMnu Rogers Matsikidze utshele iStudio 7 ukuthi ngempela linotho ngeyeqiniso kodwa igqwetha likabona uMnu Fungai Chimwamurombe uthe uChikore ubhale lempahla engekhoyo.
Owayeyisikhulumeli sikaMugabe oseyisikhulumeli sikaMongameli Emmerson Mnangagwa uMnu George Charamba, yena ozibiza ngegama lokuthi Tinoedza Zvimwe kuTwitter, uthe abazihlupha ngaloludaba bayiziwula.
Kodwa ohlaziya ezombusazwe uDr. Shephered Mpofu, ofundisa ezokwethulwa kwemibiko eUniversity of South Africa (UNISA) eTswane, kweleSouth Africa utshele iStudio 7 ukuthi unotho kaBona loChikore le iveza sobala inkohlakalo ekhona ebantwini beZanu PF, ikakhulu abaphethe umbuso.
Your browser doesn’t support HTML5
Ingxoxo loDr. Shepherd Mpofu