BULAWAYO - Owayeyimvimbi yeqembu leHighlanders, uSimon Sibanda, uthi abadlali bakudala abanengi kabasazihluphi ngokuya enkundleni ngoba bathwaliswa amagabha avuzayo yiziqhwaga ezima emagedini.
USibanda uthi indlela okuphathwa ngayo abadlali bakudala emagedini isimqede uthando olokuyabukela iqembu lakhe alidlalelayo eleHighlanders.
“Okungizwisa ubuhlungu yikuthi nxa ngifika egedini uzwe umuntu engibuza ukuthi wena ungubani nxa ngifuna ukungena ebhoreni. Lokhuyana okuyinto yikho okungenza ngizwe ubuhlungu ukuya ebholeni ngoba akufuzanga ukuthi ngifike egedini ngibuzwe ukuthi ngingubani ngumuntu owayeselusa inkomo mina ngidlala ibhola.”
USibanda uqhubekele phambili esithi iqembu lakhe alidlalelayo eleHighlanders kunengi elingakuthola ngokusebenzisana labadlala kudala kuqembu leBosso.
“Sisuka sikhohlwe ukuba ikhiwa leli lilande imali,kalilandanga ukuzoqeqetsha iqembu. Kufuze sibe kwazi ukuba kusasa nxa iHighlanders ingasela mali sikhulumisane sibone njengabadlali bakudala sicele ababili ukuthi madoda khathesi iqembu kalilamali sicela liyeqeqetsha. Kumele ngesikhathi nxa kulemali iqembu lihambise abadlali bakudala bayefundela ukuqeqetsha ukuze kusasa sisale silabaqeqetshi bethu hatshi ukuthi sicine sidinga umuntu owayedlalela iChapungu ukuthi azoqeqetsha iHighlanders.”
Uqhubekele phambili uSibanda wathi umkhuba wokuthatha abadlali abadabuka kwamanye amadolobho yikho osekusenza babe balutshwane abantu abangena enkundleni bezobukela ikanti abadlali bagcwele ngitsho lasemakhaya bakhona.
“Abadlali bemakhaya elingababoniyo yibo abadlali uqobo, ikakhulu abagadli. Asizameni ukudinga abadlali bakudala besabalale bayedinga abadlali emakhaya ngoba singeke siphile ngokuthenga abadlali. Abadlali bayaqeqetshwa bakhuliswe kodwa uthola sekuthengwa abadlali abavela koZvimba. Litsho ukuthi singaswela abadlali eMzilikazi, Njube laseTsholotsho abangadlalela iqembu leHighlanders lina?”
USimon Sibanda udlalele amaqembu abalisa elabasakhulayo eleZimbabwe Saints, elabasakhulayo eleHighlanders kanye lamaqembu amela ilizwe abalisa elabafana abaleminyaka engaphansi kwelitshumi lesikhombisa, elamajaha aleminyaka engaphansi kwamatshumi mabili, kanye lelamajaha aleminyaka engaphansi kweminyaka engamatshumi amabili lantathu.
Kuqembu leHighlanders udlale labadlali ababalisa uGift Lunga Junior, uSiza Khoza, uDazzy Kapenya, uThulani Ncube labanye.