HARARE...........Umqeqetshi weqembu lenguqu ele Highlanders uBaltemar Brito uthi ukunqoba abakwenze iqembu le Dynamos kubanikeza intshukuntshu ukuba benze ngcono esithi iqembu lakhe kalila okunye elizakwenza ngaphandle kokunqoba emdlalweni wabo le Yadah NgomMqibelo.
Ekhuluma emhlanganweni lentathelizindaba eHarare uBrito ubike ukuba iqembu lakhe lidla amalahle lonyaka esithi ukuthola inkezo ye Independence Cup abakwenze ngo Lwesibili ngemva kokubhuqa iDembare kwenze abadlali bakhe baqhubeke beledlbuzane.
UBrito uthi umdlalo phakathi kwe qembu lakhe lele Yadah ozadlalelwa e National Sports Stadium e Harare kusasa uzakuba nzima kodwa esithi kumele iqembu lakhe linqobe.
“Ukunqoba esakwenza iqembu le Dynamos kusipha intshukuntshu ngesikhathi sisiya kumdlalo wethu wakusasa. Sikhangelele ukuba kuzanceda abadlali ukuze badlale belethemba ukuba kumel sinqobe hatshi okunye”
UBrito uthi lobanje iqembu lakhe lingazange lithenge abadlali abanengi ngesikhathi somkambo ka Zibandlela kusobala ukuba iqembu lakhe lizimisele ukwenza ngcono lonyaka.
Abasekele be Tshilamoya abahlala e Harare bathi bakhangelele okunengi kuqembu leli besithi njengoba bengaliboni maviki onke iqembu labo bazasukuma ngobunengi kusasa.
Omunye wabo ngu Zibusiso Ncube ohlala e Greendale yena othi uzabe esekela iqembu lakhe e National Sports Stadium kusasa.
“Sizabe sikhona ngoba thina iBosso siyayithanda. Sizazathwalana ngobunengi siye enkundleni ye NSS ukuze sitshengise ukuzimisele kwethu lothando lweqembu”
Okusekelwe ngomunye othanda iBosso uMnu. Kith Sithole othi loba nje iqembu le Yadah livame ukuthwalisa iBosso amagamba avuzayo kusasa balakho ukunqoba.
“Kungelani lokuba iqembu le Yadah livele liyasithwalisa nzima asikhangelelanga okunegi sizanqoba hatshi okunye. Sizayidla iYadah”
Ingcitshi kwezomdlalo wenguqu uMnu Michael Mpala uthi umdlalo phakathi kwe Highlanders le Yadah unganqotshwa loba yiliphi iqembu ngoba iYadah idlala ibhola elimnandi.
“Ngumdlalo esingeke sitsho ukuba uyaphela njani. Ungakhumbula kumalanga asanda kwedlula iYadah ibatshazwe ngabanengi ngendlela edlala ngayo. Asomdlalo olula”
Iqembu le Highlanders likuhlandla lesine engalaneni yemihlomelo eye Castle Lager Premier Soccer League, lilingana imiklomelo leqembu le Dynamos elile miklomelo eyisitshiyagolombili- 8 ngemva kwemidlalo emine kuthi ele CAPS United yilo elikhokhelayo kule ingalane lile miklomelo elitshumi lane- 11 ngemva kwemidlalo emihlanu.