JOHANNESBURG - Ikusasa yezizalwane zeZimbabwe ezifika phose inkulungwane ezingamakhulu amabili - 178,000 ezilama Zimbabwe Exemption Permits, isisezandleni zedale leHigh Court kwele South Africa, kulandela ukuthethwa kodaba lokwesulwa kwamapermit abo ePretoria High Court.
Omahluleli abathathu abedale lePretoria High court abalalele impikiswano yaloludaba emthethwandaba sebelomlandu omkhulu wokwethula isinqumo sabo.
Ngomnyaka ka2021, umphathintambo wogatsha lwendaba zasekhaya, uMnu. Aaron Motsoaledi, wethula umbiko othi amapermit oxolo aphiwa izizalwane zeZimbabwe eziphose zifike izinkulungwane ezingamakhulu amabili – 178,000 azakwesulwa.
Le yinto eyaphikiswa zinhlanganiso ezithile, ezigoqela iHelen Suzman Foundation, iZimbabwe Immigration Federation lezinye ezabhalela emthethwandaba zifuna ukuthi isinqumo lesi sesulwe.
Ekhuluma emthethwandaba ekuthethweni kwalelicala elithethe insuku ezine, umeli wenhlanganiso yeZimbabwe Immigration Federation, uMnu. Tembeka Ngcukaitobi, ucele umthethwandaba ukuthi wesule lesisinqumo njengoba senziwa kunganakwanga ukuthi sizahlukumeza kanjani impilo yezizalwane zeZimbabwe lezi.
Uthe njalo esinye sezizatho yikuthi umphathintambo Motsoaledi wethula lesi isinqumo kungakhathalekile ukuthi ubunzima kwezomnotho lokuhlukunyezwa kwabantu beZimbabwe kulokhu kuqhubeka okuyizo izizatho ezimbili ezinkulu ezabangela ukuthi uhulumende aphe lababantu amapermits.
“Bekungafanelanga umphathintambo Motsoalaedi aqede amemezele ukwesulwa kwamapermit la engazange aqinisekise ukuthi izizatho ezenza abekhona kazisekho na?”
Kumpendulo yakhe, umeli wogatsha lwendaba zasekhaya, uMnu. Sean Rosenberg, uthe umphathintambo Motsoaledi wenze lesi sinqumo esebenzisa amandla omthetho ahambelana lesikhundla sakhe ubuye wathi lesisinqumo sathathwa ngokuzwelana labeZimbabwe abalamapermit la njengoba baphiwa isikhathi sokuthi bafake izicelo zamanye amapermit
“Umphathintambo Motsoaledi wasebenzisa amandla wapha abalamapermit la umnyaka ogcweleyo ukuthi bangene kwamanye.”
Isizalwane seZimbabwe, uMnu. Greatman Mkhwebu, uthi kuyadanisa kakhulu nxa yena, lezinkulungwane zezizalwane zeZimbabwe lababantwababo kungathiwa babuyele eZimbabwe ngemva kokuhlala kweleSouth Africa okweminyaka edlula elitshumi
“Abantu asihlaleni ethembeni lokuthi mhlawumbe kuzolunga ngoba akuliwa. Into yonke iyalungiswa ngomlomo. Iyabe yonakele ibuye ilungiswe ngomlomo kuyiwe phambili. Singabantu sonke singama Africa. Siyasebenzisana njalo siyadingana. So angiboni ukuthi uhulumende weSouth Africa angasilahlela izandla.”
Emalangeni amane kusathethwa lelicala inhlanganiso yeHelen Suzman Foundation ibicela umthethwandaba ukuthi waesule isinqumo sogatsha lwendaba zasekhaya lesi kantike eyeZimbabwe Immigration Federation ibilwela ukuthi kwengezwe isikhathi sokusebenza kwamapermit la ukuze abeZimbabwe laba bengabotshwa ngesikhathi kusamelwe isinqumo somthethwandaba kumbe kusalindwe ukuthethwa kodaba lwabafuna ukuphikisa lesisinqumo.
SEE ALSO:
Udaba Esilwethulelwe NguThuso Khumalo