Osomabhizimusi bakoBulawayo bathi badonsa nzima ngenxa yokugugudeka kwesisindo sedolar leZimbabwe njalo besaba lokuxokozela okumangalisayo ngesikhathi sokhetho, okungenza behluleke ukusebenza kahle. UAnnahstacia Ndlovu usethulela loludaba …
Inengi labantu eZimbabwe seliphila ngokuzisebenza ngesikhathi umnotho welizwe ugugudeka okumangalisayo. UMnu. Lovemore Moyo, okubhizimusi yamaluba enzikini yedolobho lakoBulawayo, uthi kukhanya engani amabhizimusi amanengi azavalwa ngenxa yesimo esibi somnotho welizwe.
UNkosazana Nyaradzo Marima, umphathintambo weRoyal Hotel, uthi badonsa nzima kulez’insuku.
Okubhizimusi lezimota ezithwala uzulu, uMnu. Meluleki Tshuma, uthi baphazamiswa ngabenza okungekho emthethweni.
UMnu. Nkanyiso Nleya, laye othwala abantu enzikini yedolobho, ukhala ngabezomvikela abasebenza labathwala abantu okungekho emtheweni.
UMnu. Innocent Chinanga, omunye usomabhizimusi othengisa omakhal'ekhukhwini, uthi amabhizimusi aqhuba kancane njalo akuthembisi ukuthi azakhula kunyanga ezintathu ezilandelayo.
Ukhansila kaWard 15 koBulawayo, uNkosikazi Febbie Msipa, ufisa ukuba uhulumende angenele kulokhu abakwethulela uzulu ngoba bathwele nzima.
Usomabhizimusi othengisa inyama koBulawayo, uMnu. Albert Ncube, uthi ibhizimusi lakhe liqhuba kuhle njalo kunyanga ezintathu ezilandelayo ukhangelele ukuba likhule.
Okwamanje eZimbabwe inengi lamavinkili selisebenzisa imali yakwamanye amazwe enjenge Rand leSouth Africa kumbe idollar leMelika njalo lilinganiswa ngemali yakuleli ngesisindo kusiya ngevinkili kumbe ibhizimusi. Idola leMelika lilinganiswa lelakuleli ngenkulungwane ezimbili zamadola akuleli kuthi amatshumi amabili akwele South Africa alinganiswa ledola leMelika kumbe inkulungwane ezimbili zakuleli kusiya ngabanini bamabhizimusi.
SEE ALSO:
Udaba esilulethelwe nguAnnahstacia Ndlovu