HARARE - Abakuhlangothi lwenhlanganiso yeSouthern African Development Community ebona ngezokucebisa iSADC ngokutshiyeneyo, bakwele Zimbabwe ukuzehlolisisa indlela okulungiselelwa ngayo ukhetho oluzayo.
Iqula leli likhokhelwa nguMahluleli uTicheme Dlamini owakwele Swaziland. Ekhuluma lentathlizindaba eHarare uDlamini, okhokhela iqula leSADC Advisory Council, uthi bazaxoxisana lamabandla ezombusazwe lenhlanganiso ezitshiyeneyo ngezokhetho.
Ugcizelele esithi ukuza kwabo kuleli kuzancedisa ukuba bezwe ukuba imithetho eselizweni iyahambelana na lemithetho esetshenziswa ngabe SADC.
Emhlanganweni ababe lawo namuhla lentathelizindaba, abeSADC laba babuzisise ngokukhangelelwe ngabathaphi bezindaba. Eyinye yentathelizindaba esebenza izimele, uGracious Sibanda, utshele lumhlangano ukuba intathelizindaba eZimbabwe kazikhululekanga ngesikhathi sokhetho.
Okubandla leZanu PF, uMnu. Mabutho Moyo, uthi uhulumende kaMongameli Emmerson Mnangagwa ufisa ukuqhuba ukhetho olukhululekileyo.
UMnu. Felix Mafa, okubandla leCitizens Coalition for Change, uthe kulentathelizindaba zenkampani edlelana lohulumende iZimbabwe Broadcasting Corporation, okukhanya ukuba bebethatha icele likahulumende besethula okukhulunywe liqula leli.
UMnu Desire Tshuma, ingcwethi kwezombusazwe ezimeleyo, uthi kukalutshwana okungenziwa yinhlnganiso yeSADC ukuguqula indlela ukhetho olwenziwa ngayo kwele Zimbabwe.
Iqula leli elikhokhelwa nguDlamini lilamalunga agoqela uNkosikazi Notemba Tjipueja, uMnu. Magabolle Mafiri, osebenzela iSADC, loMnu. Elijah Munyuki.
NgoLwesine lizahlangana lebandla leZANU PF lamabandla aphikisayo kuthi lingaqeda ukuzwa imibono yabantu libe selisipha iqula leSADC Organ on Defence and Politics yona ezakutsho ukuba bazabe bekhona kuqhutshwa ukhetho olukhulu lonyaka eZimbabwe.
SEE ALSO:
Udaba Esilwethulelwe nguMlondolozi Ndlovu