HARARE - Ingcwethi kwezombusazwe zithi ukungethulwa namuhla kwamabizo abakhethwe ukuba bazamela ibandla leCitizens Coalition for Change elikhokhelwa nguMnu. Nelson Chamisa, kutshengisa ukuthi kulengxabanxoza kubandla leli.
Zithi kusobala ukuba abakhethwanga ngemfanelo abazancintisa kukhetho lwamakhansila, olwabameli bedale lephalamende kanye lolukamongameli. Kodwa ibandla leCCC lithi lwenziwe kahle uhlelo lweConsensus Candidates Selection.
Lokhu kuza ngemva kokuba kumiswe umhlangano obekumele kubikelwe intathelizindaba amagama alabo abakhethwe nguzulu.
Abantu abakhulume leStudio 7 abakubandla leli bathi kulokuxabana okumangalisayo ngamanye amabizo ethulelwe labo okumele bewahlolisise engakethulelwa uzulu. Lengcwethi ezicubungula ezombusazwe zithi kuyethusa okwenzakala kubandla leCCC, okukhangelelwe ukuba lizabusa ilizwe leZimbabwe linganqoba kukhetho oluzayo. Zithi lizabusa njani uma lisehluleka ukuqhuba ukhetho lwebandla leli.
UMnu. Praise Moyo, eyinye yengcwethi lezi ezimeleyo, uthi okwenzakala kubandla leli kuveza ukuba kunzima ukuba iCCC yenze intando kazulu ngendlela ekhetha ngayo abameli bayo.
Lokhu kusekelwe ngeyinye ingcwethi yezombusazwe ezimeleyo, uMnu. Pritchard Ndlovu.
Kodwa uMnu. Bekezela Gumbo, ingcwethi kwezombusazwe osebenza kunhlanganiso yeZimbabwe Democracy Institute, uthi kumele uzulu abekezele kulokhu okwenziwa libandla leCCC.
Ibandla leCCC lithi luqhutshwa ngemfanelo uhlelo lwabo lokudinga abazalimela kukhetho olukhulu oluzakwenziwa lonyaka. UMnu. Gift Ostallos Siziba, umsekeli wesikhulumeli sebandla leli, uthi bazakwethula amagama abakhethwe nguzulu kunsukwana ezilandelayo.
UNkosikazi Ellen Shiriyedenga, obona ngokhetho kubandla leli, uyakusekela lokhu.
Kodwa ilunga ledale leZanu PF Central Committee, uMnu. Mabutho Moyo, uthi kusobala ukuba akulantando kazulu kuCCC.
Ibandla leCitizens Coalition for Change lonyaka kalenzanga ukhetho lwama primaries lisithi kumele uzulu akhethe abazalimela kukhetho oluzayo.
SEE ALSO:
Udaba Esilwethulelwe NguMlondolozi Ndlovu