HARARE - Inkokheli zamabandla ezokholo, uzulu jikelele labenhlanganiso ezizimelyo bakhonona ngokusetshenziswa kwamabandla ezokholo ekuqhubeni ezombusazwe.
Lokhu kuzangesikhathi abezombusazwe bephithizela ezinkonzweni ngesikhathi sePhasika, okukhanya kuyindlela yokudinga usekelo lwamavoti.
Inkokheli yezombusazwe ebalisa uMongameli Emmerson Mnangagwa, uNkosikazi Oppah Muchinguri Kashiri lomsekeli kamongameli, uMnu. Constantino Guvheya Chiwenga, bethekelele amabandla amakholwa ngesikhathi sePhasika lapho abakhulekelwe khona ngabavangeli bebafisela impilo enhle.
Bebesithi bathakazelela ikhefu lePhasika. Abanye abafundisi bayakusola lokhu besithi le yindlela yokukhankasela ukhetho oluzayo oluzakwenziwa lonyaka. UMfundisi Francis ngomunye wabasola izenzo zenkokheli yelizwe.
Omunye njalo osola okwenziwa ngabezombusazwe nguMfundisi Trvis Moyo, owebandla leRoman Catholic Church.
UMfundisi Simbarashe Maringosi uthi abezokholo akumelanga bencedise abakhankasela ukhetho oluzayo.
UMnu. Tapiwanashe Chiriga, owenhlanganiso yeHeal Zimbabwe Trust, laye uthi bahlutshwa ngokwenziwa ngabezombusazwe ezindlini zokukhonza uNkulunkulu.
UMnu. Reward Siziba, ingcwethi kwezombusazwe, ulombono ofanayo.
Asenelisanga ukukhuluma ngodaba lolu loMnu. George Charamba, isikhulumeli sika Mnangagwa, kanye loNkosikazi Monica Mutsvangwa akade bengaphenduli omakhalekhukhwini. Osekela ibandla leZANU PF, uMnu. Peterson Sibindi, uthi akulanto embi eyenziwa yinkokheli yebandla leZanu PF ngoba basebenza okubhekane lozulu.
UMnangagwa, uChiwenga labanye abakubandla leZanu PF bajayele ukwethekelela amakholwa ngesikhathi kukhankaselwa ukhetho. Ngempelaviki bethekelele eMethodist Church, Roman Catholic Church, Apostolic Faith Mission eyakho Mwazha leZimbabwe Christian Church. Besenza lokhu bebesiya ezinkonzweni lezi beqgoke izembatho zalezo nkonzo.