BULAWAYO - Umdlali olodumo, uChipo Tsodzo, uthi abasakhulayo kumele bakunanzelele ukuba umdlalo wenguqu ulakho ukuguqula impilo zabo.
UTsodzo uthi abadlali abasakhulayo kumele bangakhalali nxa kungakabahambeli kahle ngoba akulanto ebuya lula empilweni.
“Ibhola nxa ungaqinisela uyaphakama wedlule lokhu oyikho khona. Kumele ube ngumuntu ozimiseleyo ngoba into zakhona kazibuyi lula kodwa kumele ube ngumuntu ozimiseleyo njalo owazi akufunayo. Nxa ungenza njalo konke nje kuyahamba.”
UChipo Tsodzo ulezicoco zomdlalo wenguqu ezinengi. (VOA)
UTsodzo, odlalele amaqembu abalisa eleZimbabwe Saints, G & D, Highlanders, Masvingo United, Hwange kanye leleMwana Africa, uthole izicoco ezinengi edlala njalo uthi wenelise lokuzakhela indlu ngenxa yebhola.
“Ngathi ngisuka kuqembu leHighlanders lapho engaba khona ngomunye wabadlali abangena kucalender, ngadingwa ngabe Mwana Africa ngayadlala khona saze sadlala laseAfrica. Ngalesosikhathi ngathola lami imali ethe xaxa ngenelisa lami ukuthi ngithenge indawo yami ngayakha lami umduli ongowami.”
Chipo Tsodzo
Ilizwe leZimbabwe kulezinsuku lamiswa ukudlala lamanye amazwe ngenxa yokuba lisetheswa umlandu owokuba kulokungenela kwengatsha zikahulumende ekuqhutshweni komdlalo. UTsodzo uthi yena ngomunye wabadlali abavikela ukuba ilizwe lingajeziswa yinhlanganiso yeFederation of International Football Association, iFIFA, ngomnyaka ka1995, lapho abayadlala khona kweleZaire okulilizwe elalihlaselwe ngumkhuhlane weEbola.
“Into eyayenzakalayo yikuba kwakuvele kuleqembu lesizwe elalivele likhethiwe. Bathe sebeyale ukuyadlala njengoba eZaire kwakule Ebola thina sazinikela ukuba siyedlala ukuze ilizwe lingajeziswa. Sasibanengi labanye abagoqela uSaMaTshu (Johannes Tshuma) kanye loGift Lunga Senior.”
UTsodzo ubedume ngokuba ngumgadli olitshayela emambuleni aphinde njalo abe yimvimbi evala amanzi. Usengumqeqetshi womdlalo wenguqu. Kulez’insuku usebenza leqembu leRatanang elidlala kusigaba seSouthern Region Division One. Uke wasebenza lamaqembu abalisa eleBantu Rovers kanye leleZim Leopards.