WASHINGTON DC - Umsakazo weAl Jazeera ngoLwesine wethule ihlandla lesithathu lefilimu yawo eveza sobala ukuhuquluzwa kwegolide leZimbabwe yizigilamkhuba ezithi zilobudledlwano loMongameli Emmerson Mnangagwa.
Abasolwa laba bathenga igolide leli eZimbabwe ngemali abayabe beyithole ngendlela ezingekho emthethweni babe sebesiyalithengisa kweleUnited Arab Emirates, eDubai.
Ihladla lesithathu leli liza ngesikhathi ibhanga elikhulu lelizwe eleReserve Bank of Zimbabwe (RBZ) lisithi selivale inotho yabantu abane abaphuma kulifilimu.
Abantu laba babalisa uCleopas Chidodo, David Chirozvi, Mehluleli Dube loFredrick Kunaka, bona abaphume kumahlandla alifilimu amabili edluleyo bechasisela intathelizindaba zomsakzo weAl Jazeera ukuthi babamba liphi iqhaza ekuhuquluzweni kwegolide leZimbabwe yizigilamkhuba.
Ifilimu le, elesihloko esithi Gold Mafia: iveza njalo isikhonzi sikaMongameli Emmerson Mnangagwa uMnu Eubert Angel lalowo asebenza laye uMnu Rikki Doolan bezitshaya isifuba besithi bayenelisa ukungenisa imali engcolileyo eZimbabwe ukuze iyethenga igolide besebenza loMnangwa.
Kuhlandla elitsha leli, ifilimu le iveze ingqungquthela ebikwa isebenza lohulumende weZimbabwe ekuthengiseni igolide lelizwe eDubai uMnu Kamlesh Pattni, atshengisa intathelizindaba zeAl Jazeera amahofisi akhe eDubani lapho athi uthola imali efika kuzigidi ezilitshumi, US$10 million ngelanga ekuthengiseni igolide.
Abanye abakufilimu le ababikwa besebenza lohulumende nguMnu Ewan Macmillan loAlistair Mathias. Ibhanga elikhulu selaveza njalo ukuthi liphakathi kokucubungula inotho kaMacmillan lekaAngel.
Uzulu weZimbabwe uthukuthele ngokutshaphazwa kwenotho yeZimbabwe ngalindlela njalo abanye bathi uMnangagwa ngokwakhe kumele ethule umbiko etsho kuzulu weZimbabwe ukuthi liqiniso yini okukhulunywa yilabo abakufilimu le ukuthi basebenza laye.
Isikhulumeli seZapu uMnu Msongelwa Ndlovu uthi banxusa uzulu weZimbabwe okweleSouth Africa ukuthi ayetshengisela phambi kwesonto kaUbert Angel ngoLwesihlanu.
“Sinxusa wonke umntwana wenhlabathi, wonke umuntu kabophe ijambo. Mayihlome ihlasele laba abafana abatshontsha inotho yelizwe bembuluza ngezimota omama besifa ezibhedlela,” kutsho uMnu Ndlovu.
Kulogwalo lwe-petition osolusayinwe ngabantu phose inkulungwane ezingamatshumi amabili, 17,000 ebulenjini be-internet ethi uAngel kumele avalelwe inotho yakhe eBhilithane njalo abotshwe.
Umsekeli wesikhulumeli sebandla leCCC uMnu Felix Magalela Mafa Sibanda yena utshele iStudio 7 ukuthi sokuvele sobala ukuthi inotho yeZimbabwe itshontshwa ngobani.
“Abantwana abalamali, ezibhedlela akula ngitsho lemithi, imigwaqo ifile. Thina sithi akube le-international tribunal… ezaphenya loludaba isebenza leUnited Nations leWorld Bank,” kutsho uMafa.
Kodwa ilunga leZanu PF uMnu Believe Gaule uthi lanxa abantu abafana loAngel besolisa, abenze ifilimu le bakhanya bejonge ukungcolisa ibandla leZanu PF njengoba sokuyiwa kukhetho.
UGaule uthe: “Okukhona yikuthi umumo lo uyasitshengisa ukuthi lanxa kuvele kunjalo, kusuke kubuye ngesikhathi esibi ngoba sesilanda isikhathi sokhetho, yikho sokuphuma izinto ezinjalo.”
Lanxa abantu behlokoma phezu kwaloludaba, umphathintambo obna ngokwethulwa kwemibiko uNkosikazi Monica Mutsvangwa utshele intathelizindaba kuthange ukuthi sebephenya loludaba njalo labo abazatholakala belecala bazajeziswa.
Kutsho uMutsvangwa: “Sesilaye amapholisa kanye labezinye ingatsha ezifaneleyo ukuthi bavule uphenyo. Lowo lalowo ozatholakala ukuthi waphatheka kumisebenzi yenkohlakalo, ubusela, kumbe kungaba yiliphi icala, uzabhekana lomfutho womthetho ngokugcweleyo.”
Ihlandla lokucina lalifilimu likhangelelwe ukusakazwa ngeviki ezayo.
Your browser doesn’t support HTML5
Udaba Siluphiwa nguNtungamili Nkomo