HARARE - Izakhamizi ze Harare ziyakhonona kakubi zikhala ngokuthi zithole imibiko kubomakhalekhukhwini evela kumuntu ozithi ngu Mongameli Emmerson Mnangagwa ecela ukusekelwa ekwakheni ilizwe. Ingcitshi ezisubungula ezombusazwe zithi lokhu yikwephula amalungelo kazulu.
Imibiko le ihambelana lendawo ehlala umuntu njalo icela uzulu ukuba agcine inombolo kumakhalekhukhwini, esithi uzabe ethumela imibiko eminengi.
Omunye othole lumbiko kumakhalekhukhwini wakhe nguMnu. Tichaona Masiyambiri, ohlala emzini owe Highfields, eHarare.
“Ngithole umbiko ovela emuntwini ozithi nguMongameli Mnangagwa esithi ufuna ukusitshela okwenzakala endaweni esihlala kizo. Kuphambanisa amalungelo ethu ukuthi sithole imibiko ivela kuMongameli. Uthole ngaphi inombolo zethu?
Isakhamuzi sasemzini weBudiriro, eHarare, uMnu. Darlington Madzonga ngomunye laye othi uthole lumbiko
“Asikhangelelanga incwadi lezi ku Mongameli. Sikhangelele imisebenzi, ezempilakahle kumuntu wonke. Ukuthi aqale ukusithumela lezincwadi asikwamukeli. Sifuna ukuba asitshele ukuba uthatha ngaphi inombolo zethu.”
Ingcitshi ezicubungula ezombusazwe zithi imibiko leyi ilakho ukuphazamisa amalungelo kazulu ngoba ikhipha indawo lapho umuntu abhalise khona ukuvota.
UMnu. Thembakuye Moyo, okunhlanganiso yeAmalgamated Rural Teachers Union, uthi limibiko itshengisa ukuba kulokungahlonitshwa kwamalungelo oluntu.
“Ungabona uMongameli esenza lokhu kutshengisa ukuba usephelelwe. Usefuna ukusitshela akwenzileyo njalo. Akukho emthethweni lokhu akwenzayo.”
Lokhu kugcizelelwe nguMnu. Desires Sibindi othi nxa uMongameli kunguye othumele limbiko kuyasolisa ukuba uphiwe ngaphi inombolo zikazulu.
“Kuyamangalisa ukuba kabahloniphi amalungelo ngokuthumela imbiko engaziwayo ukuthi babathatha ngaphi inombolo.”
Inhlanganiso ebona ngokusebenza kwentathelizindaba zikhululekile, eyeMISA Zimbabwe, ithi lokhu kuthunyelwa kwemibiko akukho emthethweni besithi bazathumela umbiko ngodaba lolu abakade bengakakwenzi iStudio 7 isiya emoyeni.
Imizamo yokuthola imibono ka hulumende ngaloludaba yehlule ngoba isikhulumeli sika hulumende uMnu. Nick Mangwana walile ukukhuluma.
Ngomnyaka ka2018 uMongameli Mnangagwa wathumela imibiko efanayo ecela ukuvotelwa okuyinto eyasolwa ngabalwela ilungelo loluntu.