WASHINGTON - Abezindaba abeAssociated Press babika ukuba uMnu. Donald Trump, owayengumongameli wakwele Melika, ukhangelelwe ukuba kusasa uzazihambisa emapholiseni kulandela okwethulwe yiGrand Jury eNew York ethi kumele amiswe emthethwandaba abhekane lamacala awetheswayo.
Kubikwa ukuba uTrump wetheswa icala lokuhlawula ocatshangelwa ukuba wayengumakhwapheni wakhe, uNkosazana Stormy Daniels, inkulungwane ezilikhulu lamatshumi amathathu amadola eMelika - $130,000 ngesikhathi ekhankasela ukhetho olwenziwa ngomnyaka ka2016.
Igqwetha lakhe, uMnu. Joe Tacopina, utshele abezindaba abeCNN ukuba kaliqedakali icala eletheswa uTrump. UTacopina uthi uTrump ukhahlanyezwa ngoba ufuna ukuncintisa kukhetho lukamongameli ngomnyaka ozayo.
Abakubandla lama Democrats bathi uTrump kumele amiswe emthethwandaba ngoba kucatshangelwa ukuba wephula imithetho yokhetho.
Owayephethe idale leHouse of Representatives, uNkosikazi Nancy Pelosi, uthi uTrump kumele athoniswe amacala awetheswayo njengomuntu wonke wakwele Melika.
UTrump uthi uzakhuluma ngodaba lolu esuka emthethwandaba eNew York.
Kubikwa ukuba ulakho ukwetheswa amacala ambalwa, agoqela elokuqhuba ezamabhizimusi okungekho emthethweni.
UMnu. Believe Gaule, okubandla leZanu PF, uthi okwenzakala kuTrump kwake kwehlela owayengumongameli wakwele South Africa, uMnu. jacob Zuma, labanye abakuzwekazi leAfrica.