Umsakazo weAl Jazeera namuhla uzakwethula ihlandla lesibili lefilimu yawo echaya imisebenzi yenkohlakalo ebikwa isenziwa yiziphathamandla zikahulumende ezilobudlelwano loMongameli Emmerson Mnangagwa ekuthengisweni kwegolide.
Ibizo lalifilimu lithiwa yiGold Mafia. Ihlandla lanamuhla liza ngesikhathi isikhulumeli sikaMnangagwa uMnu George Charamba ethule amazwi okwethusela intathelizindaba izolo esithi zizabotshwa zingaqhubeka zikhuluma ngaloludaba njalo zikhuluma ukuthi uMnangagwa uyathinteka kuloludaba.
Kuhlandla lakuqala eliphume ngeviki edluleyo, elicunule abanengi, isikhonzi sikaMnangagwa uMnu Eubert Angel uphume kulifilimu etshela intathelizindaba zeAl Jazeera ayecabanga ukuthi ngabatshali bezimali, ukuthi uyenelisa ukuzincedisa ukungena eZimbabwe lemali efika US$1,2 billion etholakale ngaphandle komthetho, ukuyathenga igolide.
UAngel wathi uMnangagwa uyakwazi konke okwenzakalayo ngemisebenzi yenkohlakalo le.
Omunye ontinteka kulifilimu uEwan Macmillan uphuma esithi usebenza loMnangagwa.
Namuhla umncedisi kaAngel uRikki Doolan uzaphuma etshela intathelizindaba zeAl Jazeera ukuthi nxa zifuna ukubonana loMnangagwa, kumele zihlawule imali engangeUS$200,000, ngokubika kwayo iAl Jazeera.
Sixoxe lohlaziya ezombusazwe uMnu Effie Dlela Ncube.
Your browser doesn’t support HTML5
Ingxoxo loMnu. Effie Dlela Ncube.