HARARE - UMongameli Emmerson Mnangagwa uthi amabandla ezokholo alomlandu wokubona ukuba ilizwe liqhuba ngokuthula lokuzwisisana ukuze impumela yalo yamukelwe nguzulu waseZimbabwe kanye lasemhlabeni jikelele.
UMnangagwa wethule amazwi la eHarare ephawula uhlelo lwePastors4ED okulapho aphiwe isicoco ngabe Zimbabwe Union Council of Churches sokumbonga ngalokho akwenzela ilizwe ngesikhathi sempi yenkululeko.
Umongameli uthe uyathokoza ukuba iqula leli selitshengise ukuba abezokholo labo balesabelo hatshi ukwelusa izimvu zikathixo kuphela kodwa lasekubusweni kwelizwe njalo uhulumende wakhe uzimisele ukusekela abakholo kukho konke abakwenzayo.
UMnangagwa uthe akumelanga abozokholo bayengwe ngamazwe angentshonalanga awathi alwisa ukugenqula umbuso okhethwe nguzulu.
“Lingavumeli ukuhugwa lokusebenzisa ukholo ukwenza umsebenzi walabo abasizondayo. Labo abasemazweni asentshonalanga balamazwe abo.”
Umhlangano lo, ubanjaniswe lokugcotshwa kwabafundisi abatsha lanaphiwe incwadi zokutshadisa abantu.
Owaqala umbuthano wabafundisi laba nguMfundisi Idirashe Dongo othi bajonge ukuba abafundisi bangene kwezombusazwe besekele umbuso kaMnangagwa.
Kodwa abanye abafundisi abafana lo Mfundisi Tom Deuschle oweCelebration Centre kumaviki asanda kwedlula wakhipha ivideo esithi amabandla okholo kawamelangana esekele ezombusazwe.
Omunye umfundisi webandla leBaptist Church, uFrancis Masedza, uthi loba nje abezokholo belakho ukusekela inkokheli abayithandayo kumele bengenzi lokhu kube sobala ebantwini ababakhokhelayo.
“Thina njengebandla umsebenzi wethu ngowokuba uzulu ananzelele ukuba ufuna ubukhokheli obesaba umlimu hatshi inkokheli yonke yonke nje. Kasilamabandla okumele siwakele.”
Lokhu kusekelwe ngumfundisi Simbarashe Maringosi othi umsebenzi wabafundisi ngowokuthandazela ukuthula.
“Kuqakathekile ukuthi njengabandla sithandaze ukuthi kumele lokuthula ngesikhathi sokhetho. Ibandla kumele lifundise abantu ukuthi ukuvukelana ngesikhathi lesi akulunganga.”
Ingcitshi ezicubungula ezombusazwe zithi abe Pastors4ED loba nje besala ukuba badingela uMnangagwa usekelo kukhetho, olukhangelelwe ukuqhutshwa ngo Ncwabakazi lonyaka, kusobala ukuthi ngabanye abakunhlelo esezibunjwa kunhlangothi ezitshiyeneyo zempilo ezigoqela abo Teachers4ED, Nurses4ED, Mahwindi4ED, Mapostori4ED lezinye.