Ingcwethi ezicubungula ezomnotho zithi, ukuqonga kweleBotswana kuluhlu lwamazwe alezizalwane ezithumela imali enengi kweleZimbabwe kuyisibonelo sokuthi kulemali enengi engena ngendlela zokuthumela ezisemthethweni.
Ugwalo olwe Monetary Policy Statement olusanda kwethulwa ngusibalukhulu webhanga leZimbabwe umnunzana John Mangudya lukhomba ukuthi eleBotswana seliqonge lahlala ngemva kweSouth Africa kuzizalwane ezingaphandle kwelizwe ezithumela imali ekhaya.
EleSouth Africa yilo elilezizwalane ezinengi ezeZimbabwe njalo lokhu kuyabonakala kuluhlu lwabangaphandle kwelizwe abathumela imali enengi ekhaya. AbeZimbabwe abahlala eSouth Africa bathumela imali edlula izigidi ezingamakhulu amahlanu ($500million).
IBotswana izithola ilandela iSouth Africa, izizalwane zeZimbabwe ezikuleli lizwe zathumela imali efika phose izigi ezingamatshumi amane ($40million) ngomnyaka ka 2022.
Abacubungula ngezomnotho abafana lomnunzana Charles Nyathi bathi ukuqonga kwenani leli kungabe kutshengisa ukuthi inengi selithemba ukuthumela ngendlela ezisemthethweni.
"Okukuqala kumele sikhumbule ukuthi ngabantu abatshiya imizi, balabazali, njalo bayakwazi ukuthi umnotho weZimbabwe kawukalungi. Bayaphathisa ukuthi into zibe ngcono ekhaya.”
UNyathi uncoma imithetho efakwa nguhulumende esithi yiyo ekhanga abangaphandle kwelizwe ukuthi bathumele imali kuzihlobo labangane kungela migoqo.
Uthi abanye bayathumela ngoba bengahlalisekanga emazweni abakiwo, ngakho bakubona kungcono ukuthi bathumele imali ekhaya.
“Kuhle ukuthi sincome uhulumende ngama policies awafakayo kulezinsuku. Kunika abantu ithemba ukuthi abantu bathumele imali ukuthi izobayenzela inzuzo ekhaya.”
Kodwa uthi ukuthunyelwa kwemali ngendlela ezisemthethweni akutsho ukuthi indlela ezifana labo malayitsha kumbe ukufaka emabhasini akusekho.
“Kulokhe kukhona ukuthumela ngabomalayitsha lamabhasi. Khathesi esikubonayo yikuthi sekulendlela ezinengi okuthunyelwa ngazo ezisemthethweni njalo intengo yokuthumela imali ngendlela lezi isiphansi.”
Kukanti uMnu. Ngqabutho Mabhena oweZimbabwe Community kweleSouth Africa uthi ukuthumela imali yizizalwane eziseSouth Africa, eBotswana kanye lamanye amazwe kutsho kumele ukuthi ngabe baphathwa ngendlela engcono.
"Esikukhalelayo yikuthi uhulumende avumele izizwalane ezingaphandle kwelizwe ukuthi zikhethe inkokheli ngoba kungayisibo abathumela imali, ngabe akuselamnotho esikhuluma ngawo eZimbabwe. "
Isizalwane seZimbabwe esihlala eGaborone umnunzana Dumezweni Ncube uthi kutsho ukuthi imali ethunyelwa ekhaya inengi ngoba kuleyinye engena ngezinye indlela, okugoqela ukuphathisa.
“Ungakhumbula kulabanye abasebenza bengela maphepha okutsho ukuthi abenelisi ukuthumela ngendlela ezifana labo Mukuru. Kutsho kumele baphathise, ngakho uzathola ukuthi imali engena eZimbabwe inengi kulalokho esikubona kubhaliwe.”
Inombolo ezakhitshwa yinhlanganiso yeZIMSTATS nyakenye ziveza ukuthi kulabe Zimbabwe abaphuma bangena eBotswana abayinkulungwane eziphose zifike amatshumi amahlanu (47,000) kusukela ngomnyaka ka 2012.
Kodwa abanye bathi inombolo le iphansi kakhulu, kukhangelwe inani eliphuma elizweni lingena emazweni afana labo South Africa le Botswana, njalo abanye bayaphetsheya kuboMelika, Australia, New Zealand, Bhilithane, Canada lamanye.
Your browser doesn’t support HTML5
Udaba esilulethelwa nguMqondisi Dube olumayelana lemali eyathunyezelwa eZimbabwe okusemthethweni ivela eBotswana.m4a