BULAWAYO – Kutshone kuyisiphithiphithi eZimbabwe ngoMgqibelo abasekeli beZanu PF bevota kukhetho lwabo lwama-primaries olokudinga abazabamela kukhetho lwezwelonke olukhangelelwe ukwenziwa ngoNtulikazi kumbe ngoNcwabakazi lonyaka.
Kodwa bekulengxabangxoza koBulawayo lapho abanye abasekeli balelibandla abehluleke khona ukuvota ngoba bethole amabizo abo engekho kungwalo ezitshengisa ukuthi bangamalunga alelibandla.
Esititshisi esisodwa kuphela lapho obekuvotelwa khona, kuWard 26, eMganwini, abantu abalikhulu behlulekile ukuvota ngalesi sizatho.
Abasekeli beZanu PF laba bathi amabizo abo akhitshiwe ngabomu ngoba inkokheli zalelibandla zilabantu ezifuna banqobe kukhetho lolu.
"Ama-cell ethu sabhalwa aqinisekiswa kodwa thina ama-cell ethu wonke awakho,” kutsho omunye wabo uNkosazana Selina Chiromo.
“Thina njengathi sikoNikitha Mangena sithole i-cell eyodwa phakathi kweziyisitshiyagalolunye. Sithi 5 million votes ED Pfe, uzangena njani abantu beqalisa ukubulala iground."
Abasekeli beZanu PF bebethukuthel ngemva kokwehluleka ukuvota kukhetho lwebandla labo ngoba amabizo abo ebengekho kuluhlu lwamalunga.
Omunye njalo umsekeli weZanu PF, ugogo MaNdebele uthe uzwa ubuhlungu obukhulu ngokuvinjwa ukuvota libandla lakhe. "Ngivuke ekuseni sibili ngijabulile lami ukuthi ngizovota, nxa ngifika ngifice ukuthi i-cell yethu Isenzangakhona amabizo kawakho,” kutsho uMaNdebele.
“Kusicaphulile ukuthi yindaba amabizo ethu engekho kodwa awabanye ekhona. Isicelo sethu yikuthi kuphindwe ukuvotwa."
UMnu Sipho Gandary yena uthe, "Isimanga esikhona, yikuthi isifiso sokuthi sivote kodwa amabizo ethu awakho kudala sifike.
“Bakhona abantu ababafunayo, yibo abalamabizo akhona. Bazama ukuqila ngendlela yokuthi kulabanye vele abakhulu bakhona abathethe amabizo lawana bawafihla."
Obekhangele ukhetho, upresiding officer, kuWard 26 uMnu Ntando Dube ukufakazile ukuthi ngempela abanye abavotanga ngoba amagama abo ebengekho kuma-Cell.
"Yikho nje okuke kwangani kuba le-commotion mbijana kodwa sesikulungisile."
Ihofisi yebandla leZanu PF koBulawayo lapho obekuvotelwa khona ngoMgqibelo kukhetho lokudinga abazamela lelibandla kukhetho lwezwelonke.
Ilunga ledale leZanu PF Politibro uMnu Tshinga Dube uthe ingxabangxoza le idalwe ngabaqhuba lolukhetho okuthiwa bazimele bodwa abeForever Associates Zimbabwe Trust, bona ababikwa bephiwe lumsebenzi nguMongameli Emmerson Mnangagwa.
Endaweni ezinengi zeMatabeleland North leSouth kubikwa abantu bevote ngokuthula kukanti eMashonaland West kukhanya amaphepha okuvotisa aphuzile ukubuya njalo ukhetho kulezindawo lubikwa lulakho uqhubeka kusasa ngoba abantu bebanengi kakhulu.
"Ukuhanjiswa kwama-ballot papers eMashonaland West akuhanjiswanga ngendlela, ngakho angiboni ukuthi ukuvota kuzaphela namuhla,” kutsho isikhulumeli seZanu PF uMnuChristopher Mutsvangwa.
EMidlands laseMasvingo ukhetho lolu lukhangelelwe ukwenziwa kusasa.
Lungedlula ukhetho lweZanu PF, uMongameli Emmerson Mnangagwa ukhangelelwe ukwazisa uzulu ukuthi ukhetho lwezwelonke olokudinga amakhansila, amalunga ephalamende kanye loMongameli welizwe lonyaka luzaqhutshwa ngaluphi usuku.
Your browser doesn’t support HTML5
Udaba Siluphiwa nguEzra Tshisa Sibanda