BULAWAYO - Inhlanganiso ezimeleyo eyeIntuba, eyabunjwa nguMnu. Raphael Mthombeni, isizalwane seZimbabwe esesihlala eMelika, ngenjongo yokuphathisa abantu bemaphandleni kunhlelo zokuzinakekela, isigebhe imigodi yamanzi lokufundisa abahlali bemaphandleni indlela zokulima ezihambelana lendawo abakizo ukuze kwenqatshelwe udubo lwendlala.
Inhlanganiso le ithi ilwisana lobuyanga lendlala ehlasela izakhamizi zemaphandleni ngokuncedisa ukuthi uzulu athole amanzi ahlanzekileyo okunatha kanye lawokulima ngokuthelezela.
Balima esivandeni esisekelwa yinhlanganiso yeIntuba
Umqondisi oweIntuba, uMnu. Raphael Mthombeni, uthi, "INtuba yi-organisation encedisa izakhamizi ikakhulu lezi ezisemaphandleni ezilomhlabathi omlutshwane esingathi thina ngesilungu yi-small holder farmers. Ayisizi umuntu ngamunye ngamunye. Ithi abantu baqoqane babeliqembu. Sigebhela labo esibonayo ukuthi laba sebeswele amanzi kuphela.
Emangweni weLower Gweru, uMnu. Mcebisi Bhebhe, uthi inhlanganiso le ibasize kakhulu ngemigodi yamanzi.
Okunye okulinywa ngabalimi. (Photo: Ezra Tshisa Sibanda)
"Yi-organisation enhle kakhulu esithuthukisileyo njengesigaba kumbe ngithi njengendawo yako Gedleni lapho akade sithwele nzima kakhulu endabeni zamanzi ikakhulu lapho ekade silima khona engadini. Indaba yamanzi ibisikhathaza kakhulu ngoba besi rely ngamanzi ezulu. Ukungena kweNtuba kithi hayi umsebenzi waba lula kusukisela leso sikhathi kuze kufike kathesi."
Isiqinti seKezi asila zulu elinengi kodwa Intuba seyagebhela abantu imigodi yamanzi. UMnu. Mqondisi Ncube uhlala eRatanyana uthi sebemnandi.
Abanye balima umumbu. (Photo: Ezra Tshisa Sibanda)
"Kakhulu ngale sibambe ezokulima. Siqalisa silokuima kwezingadi kanye lokulima kwezifuyo konke ukulima lokhu sikubamba ndawonye izifuyo lezinkukhu lazo siziphethe khonalapha. Emanzini okunatha sesingunamber 1, sisuke lapho Intuba isnike insimu, isnike amanzi lensimu lamaSolar. Kuyi price okungeke sikwanise ukuthenga lokhu so emanzini sesingunumber 1 lezingadi zethu sesikwanisa sesanelisa ukulima sizimele kutshukuthi okokudla asisela challenge."
Lasemangweni waseGwanda, sebezilimela ngoba amanzi sebelawo. UNkosazana Tsibanani Tlou oweKafusi, uthi selima okwamagama.
Abalimi abasekelwa yinhlanganiso yeIntuba
"Ama vegetables like onion, imbhida, amatamatisi. Akusela sikhathi sokuthi umuntu uyatshona ehlezi ekhaya engala msebenzi awenzayo plus ezintweni ezincane ezinjengokuthi ukuthengela abantwana amabhuku amapen lani lefees yonale ingathi eyama primary schools siyenelisa ukuthisiyibhadale plus hayi lokudla hayi kuyasuthwa."
Intuba ayigebhi migodi yamanzi kuphela, iyafundisa izakhamizi ngezilimo zokuthelezela. UNkosikazi Phendukani Ncube uthi ufunde okunengi kunhlanganiso le.
Abalimi abasekelwa yinhlanganiso yeIntuba eZimbabwe
"Safundiswa ukubana senze ngama Raised Beds ayiwo asinikeza indlela elula eyokulima. Ungenza iRaised Bed ulithelela nge Drip system, awuthathi isikhathi esinengi usengadini njalo sesenze imbheda eminengi kakhulu sesilezivuno ezinengi sesithengisile sathola imali esifisa ukukwenza iproject yama broiler lenkukhu zamaqanda."
Isiqinti seNkayi esabelweni seMatabeleland North laso siphathisiwe. UMnu. Melamisi Msimanga udabuka khona.
Abanye balima amatamatisi.
"INkayi silama gardens angu 21, asetshenzwe yi Ntuba kukanti siyathaba kakhulu INtuba isisize kakhulu. Mina ngokwami ekuqaleni kwami bengihlupheka kakhulu amanzi ngikwanisa ukumelela amanzi awatshe ngomuntu uphinde ugeze ngawo. Yikho-ke iNtuba namhlanje ingisize kakhulu ngoba sengikwazi ukunatha amanzi aclean ngigeze ngamanzi aclean ngasosonke isikhathi. Sengikwazi ukulima ngidle ukudla okuvela emasimini. Leyonto nje ngiyikwanisile ukuthi ngiyichayise iNkayi yonke kuze kube yi-21 Gardens."
Ngaphandle kweZimbabwe Inhlanganiso yeNtuba ilenhlelo zokugebha imigodi yamanzi lokufundisa ukulima kubahlali bemaphandleni amazweni athi Zambia, Botswana, Lesotho, Namibia leMozambique