BULAWAYO - Ngesikhathi umhlaba uthakazelela inyanga yembali yabesifazana ngale inyanga kaMbimbitho, ukwanda kwezehlakalo zokudlwengulwa lokubulawa kwabesifazana kwele South Africa sekubatshiye bephilela evalweni.
Ngokutsho kwezibalo zogatsha lwezamapholisa kwele South Africa, kusukela ngenyanga ka Mfumfu kusiya kweka Mpalakazi nyakenye kudlwengulwe abesifazana abedlula izinkulungwane ezingamatshumi amabili (12,000). Abafika izinkulungwane eziyisithupha (6,000) kuleli nani badlwengulwe ngabantu abebebathemba.
Kulamakhulu abesifazana ababuleweyo ngalesi sikhathi kantike abanye batshaywe batshiywa bebangwa lezibi.
Lokhu sekutshiye inengi labesifazana kwele South Africa lithithibele. Isizalwane sakwele South Africa uNkosazana Nelly Netshitendze utshele iStudio7 ukuthi kulusizi ukubona abesifazana bebulawa ngitsho langabantu ababaziyo.
Inengi labafazi bacina bebulawa ngomkabo ngoba bethembele kubo kuyo yonke into abayidingayo empilweni.
Owesifazana weZimbabwe uNkosikazi Corrence Mukosi-Ncube uthi abesifazana abavela kwamanye amazwe labo bathwele amagabha avuzayo.
Ngingathinje ngehour uyezwa sekuthiwa sekwenzeke okuthile kusenziwa ngobaba kwabesimame ekubeni boina obaba yibo okumele basivikele. Bakithi bobaba siyacela, siyashweleza. Omama bafihleni ngaphansi kwamakhwapha enu hayi ukuthi libahlukumeze. Omama bacela ukunakakelwa benakakelwa yini bobaba hayi ukuthi libahlukumeze. Ngiyakhala, ngiyashweleza ngokwami ngithi no ku gender based violence.
Enkulumeni yakhe yesizwe lonyaka iState of the Nation Address Kanye lemhlanganweni obuhlose ukudinga indlela zokuqeda ukuhlukunyezwa kwabesifazana oqhutshwe ekupheleni komnyaka ka2022, umongameli Cyril Ramaphosa weSouth Africa uvumile ukuthi imizamo yonke eyenziwa okwamanje kayenelanga.
Ukuhlukunyezwa lokubulawa kwabomama labantwana elizweni sekukubi okokuthi akutshoni ilanga kungenzekanga.
Okhokhela inhlelo zeGender Commisson esabelweni saKwaZulu Natal uNkosazana Zanele Ncwane uthi osekufuneka khathesi ngamacebo.
Ngesikhathi sibhekane lesihlapha sengculaza lesandulelangculaza, kwabakhona icouncil eya establishwa yabizwa ngokuthi yinational council. Nala kulokhu esibhekene nakho siyafisa ukuthi kube nale icouncil. Ngoba ma kukhona I icouncil, icouncilile iyafundwa, ifakelwa imali ukuthi ikwazi ukuthi kube yiyona ehamba phambili ibengumhlahlandlela. Sayinqoba kanjalo impi le esasibhekene nayo isandulela ngculaza lengculaza.
Ezinye zezinqumo ezithethwe emhlanganweni wendaba zabesifazana nyakenye zigoqela ukukhuthaza ilizwe lonke ukuthi lisukume lilwisane lokuhlukunyezwa kwabomama.