BULAWAYO - Ibandla leZanu PF ngoMgqibelo lizaphatheka kukhetho lokudinga abazalimela kukhetho olukhulu oluzakwenziwa lonyaka.
Kulabasakhulayo abanengi abafisa ukungena kukhetho lolu.
Yisiphithiphithi okwamanje koBulawayo abalandeli beZanu PF bekhankasela ukhetho lwabo. Umphathintambo wezemali, uMnu. Mthuli Ncube, uzamela iCowdray Park edale lephalamende. Akula oncintisana laye kukhetho lwama primaries.
Omunye njalo ozangena kukhetho engaphikiswanga ngumseleli kamphathintambo wezokuthengiselana, uMnu. Raji Modi, omele iBulawayo South edale lephalamende.
UMnu. Tshinga Dube, ilunga ledale leZanu PF Politibro, uchasia kabanzi ngokhetho lolu.
"Wonke amaward ayakhetha ngaphandle kweka Ncube eCowdray Park leka Modi eBulawayo South, yibo abangaphikiswayo, yibo abangaphikiswayo kuyabe kungela muntu obaphikisayo."
UAlderman David Ndlovu, ilunga leZanu PF Central Committee, uthi abafisa ukungena kukhetho lwama primaries bakhankasa ngokuthula.
"Ngokulungiselela osukwenziwe ngibona azahamba kuhle engileqiniso lethemba ukuthi lakhonapha kuZanu-PF abantu abasoke bakhethe nje, bazakhetha umuntu abamkhangeleyo ukuthi uzabathuthukisa labo uzathuthukisa isigaba sako Bulawayo. Angikhangeli Bulawayo kuphela mina ngiyabe ngikhangele le region as a whole, sikhangele ukuthi abantu laba ngabakithi bengakhathelekile ukuthi bakhuluma limi bani, kodwa ngabantu engikhangele, kumele kube ngabantu abazakhukisa iregion ingasaleli emuva ngoba vele iregion yethu ikhanya isalela emuva ezigabeni ezinengi.
UNdlovu ukhuthaza abalandeli balelibandla ukuba bakhethe abantu abazamela uBulawayo ngothando.
"Kuyakhanya sibili ukuthi sokwabalenguquko ethize ngezizatho ezithize mhlawumbe ezenza ukuthi IBulawayo ingasabi ngu Bulawayo le eyaziwayo. Zinengi izizizatho elizibonayo okugoqela khonokho ukuthi sesikhetha abantu abangalathando koBulawayo kukanti abantu ababengena koBulawayo ngothando koBulawayo bayasebenzela uBulawayo belothando koBulawayo ngoba ukufa koBulawayo uyabukuthatha njengo kufa kwakho, ukuphumelela kuka Bulawayo ukuthatha njengokuphumelela kwakho.
ULungile Ncube, umlandeli webandla leZanu PF koBulawayo, uthi ukhetho lwangoMgqibelo selumphuzele.
"Siyakhetha abayasimela kukhetho luka 2023. Thina njengebasakeli bebandla leZanu PF silethemba ukuthi iparty izasipha ama candidates aright siwine silungise uBulawayo wethu."
Abanye abazancintisa kulolukhetho lwama primaries ebandla elibusayo ngumculi olodumo, uSandra Ndebele, ofuna ukuba ngukhansila elokitshini lePelandaba loMnu. Qhubani Moyo, ofisa ukumela isigaba seInsiza North edale lephalamende. UMoyo wake wasebenza kukhomishini ebona ngezokhetho iZimbabwe Electoral Commission.