BULAWAYO - UMongameli Emmerson Mnangagwa uthi inkokheli zomdabu yizo ezihlala labantu abanengi kakhulu elizweni abangaphansi kwazo abasemaphandleni ngakho zilomlandu wokulondoloza ukuthula lokubambana ngesikhathi ilizwe lisisiya kukhetho lonyaka.
Ubekhuluma ngoLwesithathu emhlanganweni wezinduna walonyaka, lapho eziphiwe izimota nguhulumende lenhlanyelo ngabeNational Aid Council besithi basekela isiphala senkosi.
UMnangagwa ukhulume kabanzi ngokuthula langokubambana elizweni njalo wathi kufanele izinduna zibone ukuthi ibandla lakhe liyanqoba kukhetho.
“Inkokheli zomdabu zihlala labantu emakhaya abanengi okumangalisayo ukwedlula emadolobheni ngakho siyacela nkokheli zethu zomdabu ukuthi ngesikhathi sisiya kukhetho lonyaka lilondoloze ukuthula abantu babambane.”
Eyinye yezinduna uMnu. Sidalizwe Dube Masendu, osuka ePlumtree eBuliluma, ngomunye wabaphathake emhlanganweni lo.
“Siyamuzwa umongameli ukhuluma ngokuthula kodwa okusimangalisayo yikuthi imigwaqo ayihambeki asazi ukuthi ngesikhathi bezokhankasa bazahamba njani langesikhathi sokhetho.”
Induna uMtshana Khumalo weBubi, ongumsekeli kamongameli wedale lezinduna edale lephalamende, eleChiefs Council, uthi uzulu ubhekane lenhlupho ezinengi emaphandleni.
Isikhulumi sebandla leCitizens Coalition for Change koBulawayo, uMnu. Swithern Chirowodza, uchothoze ukubanjwa ngamandla kwenkokheli zomdabu ukuthi ziphatheke kwezombusazwe.
Olwela amalungelo olunt,u uMnu. Effie Dlela Ncube, uthi umongameli uselulaza amandla enkokheli zomdabu ngokuzimba ngamandla ukuthi zibone ukuba ibandla lakhe liyanqoba.
Inkokheli zomdabu zibalise inkinga ezinengi ezihlangana lazo ezikhangelele ukuthi uhulumende azilungisise ezibalisa iholo elingasathengi lutho, imota zokuhambisa, indlala, imigwaqo engasahambeki, udubo lwabemba amatshe aligugu ngokungekho emthethweni ababizwa ngokuthi ngamakorokoza labazinika umhlaba ngaphandle kwemvumo.
Umhlangano walonyaka, oqalise ngoLwesibili wagqitshwa ngoLwesithathu, ubuqhutshwa ngaphansi kwesihloko esithi “Firm Cultural Foundation for Community Development.”