BULAWAYO - Abekhomishini ebona ngokuqhutshwa kokhetho, eyeZimbabwe Electoral Commission, bathi ngeSonto phambi kwakusasa bazasungula uhlelo lwabo olweMobile Voter Registration lapho abazabe bebhoda ngelizwe lonke bebhalisa abantu abalelungelo lokuvota, okwamalanga alitshumi.
Loluhlelo luqala mhlaka 12 lusiyacina mhaka 21 Mbimbitho njalo kuzaba ngokukucina ukubhalisela ukuvota kukhetho lwalonyaka.
Inengi elingakabhalisi ukuvota lamkela ngenjabulo enkulu ukuthi sebezabhalisa eduze lalapho abahlala khona. Ukubhalisa ukuvota emahofisini aweZEC bekuvuliwe ngaso sonke lesi isikhathi njalo bekulabantu abanengi abakade besiya khona ukuyabhalisa okugoqela abakubutho labohlangothi lwabalinda emajele.
UMnu. Abenicho Bhebhe webandla elihpkisayo eleCitizens Coalition for Change ukhuthaza abangakabhalisi ukuthi bathathe leli thuba ukwenza njalo.
Amasotsha abhalisela ukuvota koBulawayo. (VOA)
"Kuqakatheke kakhulu ukuthi wonke umuntu ahambe ayebhalisa ngoba nxa ungasabhalisanga khathesi, ungabhalisa sokuvaliwekutshukuthi kawuvoti lonyaka uzaze uyevota after 5years. Labangazake bavote labangalazithupha kuthwa kuyabe kuphunyiwe kubhaliswa izithupha hambani liyebhalisa izithupha ukwenzela ukuthi likwanise ukithi libhalise ukuvota livote ke kukhetho luka 2023. Ukhetho luka 2023 yilo olungasikhiphela lonke uhlupho esilalo elizweni, singazimisela ukuthi siyevota."
UMnu Joseph Tshuma, isiphathamandla seZanu PF koBulawayo, uthi uhulumende wakhe ubone kufanele ukuthi ZEC ilande abantu abafuna ukubhalisa.
"IZEC ize iyehle phansi ebantwini ukuthi abantu ba register ukuvota, ukuvota kuyinto eyalwelwa ngabobaba bethu labomama bethu belwela inkululeko yokubana omunye lomunye abelelungelo lokuvota ngskho ke lilungelo elomuntu wonkeoyabesefike emnyakeni yonaleyo efunakayo engu18 ukubana avote."
Umsekeli wesikhulumeli seCitizens Coalition For Change CCC, uMnu. Gift Ostallos Siziba, uthi nxa abantu befuna ibandla lakhe linqobe likhulule ilizwe kababhilise ukuvota.
"Sikhuthaza abantu bakithi kungenani ukubana ke ungaphi njalo uvela ngaphi nxa uyisizukulwane seZimbabwe esileminyaka engu18, kusukela mhla ka 12 kuze kufike mhla ka 21 kule voter registration blitz so yilo uhlelo esihamba ngalo thina njenge CCC ngoba ukuze sinqobe ukhetho olubuyayo silungise izinto kufanele abantu beZimbabwe bephume ngobunengi ikakhulu emaphandleni bebhalise ukuvota njalo belungele keukuvota ngosuku lokhetho oluza announswa ke emalangeni abuyayo."
KoBulawayo kubikwa kubhalise abantu abanengi ukuvota njalo inengi labo kuthiwa livela kwezinye indawo okuyinto esolwa ngabebandla eliphikisayo ele Mthwakazi Republic Party MRP.
UMnu Mqondisi Moyo, umkhokheli walelibandla, chasisa kabanzi ngensolo yabo ngalolu hlelo.
"Kuthwe emahofisini eZEC koBulawayo khonaphana..., Matebeleland North & Bulawayo, kubuya abantu bevela izindawo ezitshiyeneyo, abanye bavelela kuboGokwe, kwezinye indawo zeMashonaland bezoregister ukuthi bavote koBulawayo. Kuyabonisa ukuthi abantu laba baserious ngokuthi ba take-over iMthwakazi yonke njalo kuyabonisa ukuthi bafuna ukuletha abantu abavela kwezinye indawo eMashonaland khonangale bezovota koBulawayo, ukwenzela ukuthi thina singabi lethuba lokufaka abethu abantu esfuna bangene. Ngiyalicela, ngiyalinxusa, ngiyalincenga Mthwakazi omuhle ukuthi asphakameni, singakhalalini, uMthwakazi wethu"
Omunye obhalise ukuvota namhlanje koBulawayo nguMnu Rufaro Chikosha wase Gweru.
"Sithethwe eGweru ngale ngama bus eZANU asiletha lapha koBulawayo ukuthi sizo register ukuvota. Wena vele awuhlali koBulawayo? Hayi mina ngihla eGweru koBulawayo angihlali ngiyaqala ukubuya la KoBulawayo, kuthiwa uzavota la? Ye kuthwa sizavota la."
Osakhulayo uEric Gono ukhuthaza abatsha ukuthi bayebhalisa ukuvota njengoba sokuvuliwe ukuze baqede udubo labo ngokukhipha umbuso weZanu PF.
"Nxa sikhangele sokule 43 years sihlupheka njengabasakhulayo beZimbambwe and ungangena emalokitshini lapha abantwana bayabulawa zi njengu indaba zestress ukuswelakala kwemisebenzi. Angeke si survive ezinye i5years under igovernment le esikiyo so ngikhuthaza ontanga kakhulu ukuthi asambeni siye register ukuvota yilo leli ithuba esilalo elilodwa withini 5years ukuthi sibe lohulumende ozabe evulela ontanga amathuba."
Uhlelo lolu lokubhalisa ukuvota ngolokucina kulabo abafuna ukuvota lonyaka. UMongameli Emmerson Mnangagwa ukhangelelwe ukwethula umbiko wakhe wakhetho lalonyaka lokuthi lwenziwa kuyiphi inyanga kungakudala.