WASHINGTON DC - Abenhlanganiso ezimela ababalisi kanye lozulu jikelele sebeveze ukuthukuthela phezu kwe-video esenkundleni zokuxhumana eveza abantwana besikolo abangabafana betshaya kabuhlungu omunye umfundi oyintombazana.
Akukacaci kuhle ukuthi abafundi laba ngabasiphi isikolo kodwa abanye bathi kukwenye i-secondary eseTsholotsho.
Kuli-video, abafana laba babonakala bebhaxabula luntombazana ngenswazi lengodo njalo omunye umfana uthwele ibhemba.
Uzulu uthi abafana laba kumele babotshwe ngoba abakwenzayo kuyibudlova obungamelanga buvunyelwe.
Isehlakalo lesi siza ngemva kokubulawa komunye umfundi weFounders High School koBulawayo ngenyanga ephelileyo, uWayne Ndlovu, yena owagwazwa ngengqamu ngumfundi weHalimton High School.
Isikhulumeli senhlanganiso emela ababalisi bemaphandleni eyeAmalgamated Rural Teachers Union of Zimbabwe (ARTUZ), uMnu Thembakuye Moyo, utshele iStudio 7 ukuthi amapholisa kumele angenele masinyane abophe abafana laba.
UMoyo ukhuthaze njalo uhulumende ukuthi esule umthetho ofakwe eminyakeni esanda kwedlula owalisa ababalisi ukutshaya abafundi ngoba esithi lokho yikho osokwenza abantwana besikolo babe ngamahlongandlebe.
Sehlulekile ukuxhumana lesikhulumeli samapholisa, uMnu Paul Nyathi, ngaloludaba kanti isikhulumeli sogatsha lwezemfundo, uMnu Toungana Ndoro, laye ubengabambeki.
Your browser doesn’t support HTML5
Ingxoxo loMnu Thembakuye Moyo