HARARE - Umphathintambo wesigaba seSverdlovsk kw eleRussia, uMnu. Vyacheslav Yarin, owethekelele eZimbabwe kanye lequla lakhe, usethembise ukuba ukuthi akusoze kube lokuphazamiseka komsebenzi wezokuthengiselana phakathi kwamazwe womabili ngenxa yokuqhubeka kwempi phakathi kwelizwe lakhe lele Ukraine.
Lokhu kuphume emhlanganweni wequla leRussia leziphathamandla zengatsha ezitshiyeneyo zikahulumende owenzelwe e Harare, seligqiba uhambo lwekwethekelela eZimbabwe.
UYarin uveze ukuba isigaba sase-Sverdlovsk avela kuso yiso esikhokhelayo kwezomnotho weRussia, ngakhokhe bakubone kuqakathekile ukuzasungula amabhizimusi e Zimbabwe kungakhathalekile ukuthi baphakathi kwempi leUkraine.
“Ngizoludinga kabanzi lolu daba eRussia enkundleni yase-INNOPROM lapho sizokwabelana khona ngombono wethu wokuthi singathuthukisa kanjani ezokuthengiselana phakathi kwethu lokuthi singawamukela kanjani umbono wenu kulenkundla ye-INNOPROM ozonikeza inzuzo enkulu kuyo.”
UMnu. Japhet Moyo, unobhala jikelele wenhlanganiso yezisebenzi eyeZimbabwe Congress of Trade Unions, uthi kunengi osekuphazanyiswe yimpi phakathi kweRussia le Ukraine.
“Kusobala ukuthi siyingxenye yomhlaba kunjalo ke angazake siphunyuke kulokhu okwenzakala e-Ukraine le-Russia, kumbe singathi angazake sikubalekele lokho okwenzakala e-Ukraine le-Russia. Kungakaze kube lempi bekulula ke ukuthi sibe lobudlelwano obusegcekeni lamazwe amabili la, besingena emkambo nje kalula si-order esikufunayo kungaba kuseRussia, kungaba seUkraine.”
Kodwa isikhulumeli seZanu PF ongene lumhlangano, uAmbassador Christopher Mutsvangwa, uthe akaboni impi le iphazamisa ubudlelwano beRussia leZimbabwe.
Seliphinde labhekana lempi kodwa belilokhu lingabantu ababalulekileyo njalo silesiqiniseko kakhulu sokuthi iRussian Federation izophuma kule mpi ilamandla kakhulu njalo ibumbene, ikulungele kakhulu ukuphatheka kwezokuthengiselana labanye umhlaba wonke.”
AbeRussia babikwa imisebenzi yabo lohulumende wakuleli ingacacanga njengoba kuyimfihlo phakathi kwabohulumende bamazwe womabili.
Ngomnyaka ka 2019, uMongameli Emmerson Mnangagwa esanda kungena embusweni, wethekelela uMongameli Vladimir Putin, elenjongo yokuqinisa ubudlelwno bokuthengiselana phakathi kwamazwe womabili ngemva kokuxabana lawentshonalanga agoqela eleMelika, amazwe akumanyano weEuropean Union, eleBhilitani lamanye.
Amazwe le ethese inkokheli yebandla leZanu PF izijesizo zenotho ezithe bakhuthaza ubudlwangudlwangu eZimbabwe, ikakhulu ngesikhathi sokhetho.
Inkampani yakwele Russia, iAlrosa, yemba amadayimana kwele Zimbabwe.
Nyakenye abeRussia bamise umsebenzi obekumele bewenze eZimbabwe wokwemba amatshe aligugu i-platinum, okwakumele kusungulwe eDarwendale njalo wawuzongenisa ama-billion amathathu amadola eMelika – US$3billion.