BULAWAYO - lnhlanganiso yababalisi eyeAmalgamated Rural Teachers Union of Zimbabwe, yethule umbiko othi ababalisi abangaba yisilinganiso sokungamatshumi amahlanu ekhulwini-57%, emaphandleni lasemadolobheni, benelise ukutshengisela ngokungayi emsebenzini ngoLwesithathu, befuna ukuthi iholo labo lengezwe lifike kumadola eMelika aphezu kwenkulungwane eyodwa-US$1,260 ngenyanga.
Abanye ababalisi baye emsebenzini ngoLwesithathu, kodwa kwaba labanye abenelise ukulalela inkuthazo yenhlanganiso zabo yokuthi batshengisele ngokungayi emsebenzini ukuze bangezelelwe iholo, okwamanje eliphansi kwamadola alingana lamatshumi amane amadola eMelika ngenyanga.
Isikhulumeli senhlanganiso yeAmalgameted Teachers Union of Zimbabwe, uMnu. Thembakuye Moyo, uchasisa kabanzi ngenyathelo abalithetheyo.
“Kusukela lamhlanje Mhlaka 1 Mbimbitho ababalisi bathethe isinqumo sokuthi abayi emsebenzini kuze kuyengena iUS$1,260 dollars kuma-account abo ebhanga.Isingqumo sokuthi bathole iUS$1,260 asophutha: Kungemva kokuba isalary crisis ixoxwe yavumelwana, ukuthi izidingo zombalisi sezingeneliswa yi-US$1,260, njalo ababalisi balesiqiniseko sokuthi uhulumende ulayo leyo mali ngendlela ayenza ngayo labanikana ngayo izimali khonale phezulu. Umlando osusele yikuthi i#Teachers4USD ibhalele ama-union onke, sibanxusa ukuthi mhlaka 1 baphatheke kumbhikitsho.
Uqhubeke ethi ababalisi abangaba yisilinganiso sokungamatshumi phose ayisithupha ekhulwini- 57 percent bakhalele umsebenzi ngoLwesithathu.
“Inani leli liqhubeka liqansa ngoba abanye baphuzile ukuthola umbiko wokukhalala umaebenzi ngoba amagagasi engahambi kahle kulezinsuku. Abanye abaye emsebenzini bafike bazihlalela abazange basebenze, emaphandleni lemadolobheni.”