WASHINGTON DC - EleZimbabwe linxuswe emhlanganweni weCommonwealth ohlaziya ukuhanjiswa kwembiko oqhutshelwa kweleBhilithani, okuyinto ezinye ingcwethi ezithi ikhomba ukuthi lumanyano usuzimisele ukwamukela iZimbabwe njengelunga lawo.
Umhlangano weCommonwealth Telecommunications Organisation Ministerial Alliance for Digital Nations 2023 lo usaqhubeka eNgilandi lapho eleZimbabwe elimelwa khona ngumphathintambo kahulumende obona ngokukhulumisana ngendlela zakulezinsuku uMnu Jenfan Muswere.
EleZimbabwe lakhutshwa kuCommonwealth ngumuyi uMnu Robert Mugabe esanguMongameli ngo2003 ngesikhathi uhulumende wakhe esetheswa umlandu wokwephula amalungelo oluntu yilumanyano.
Uhulumende kaMongameli Emmerson Mnangagwa sowacela ukuthi iZimbabwe ibuyiselwe kulumanyano njalo ulokhe emelele impendulo. Amanye amalunga eCommonwealth asola uMnangagwa esithi uya phambili ngokwephula amallungelo kazulu.
Kodwa ingcwethi kwezombusazwe uMnu Effie Dlela Ncube utshele iStudio 7 ukuthi ukunxuswa kweZimbabwe emhlanganweni weCommonwealth lo kuveza ukuthi lumanyano ungaba usuncibilika njalo usuzimisele ukuvumela iZimbabwe ukuba lilunga lawo.
Your browser doesn’t support HTML5
Ingxoxo loMnu Effie Dlela Ncube