HARARE..................
Ingcwethi ezibona ngezokhetho zithi ukwethulwa okusemthethweni kogwalo lokwehlukaniswa kwemingcele, olwe-Final Delimitation Report, oluzasetshenziswa kukhetho lwalonyaka, sokusitsho ukuba aseqalisile amalungiselelo okhetho lwe-Zimbabwe, oluzakwenziwa ngoNcwabakazi.
Owake waba ku khomishina yezokhetho eye-Zimbabwe Electoral Commission (ZEC), uMnu Qhubani Moyo, uchasisa ngokwethulwa kwale i-report kugwalondaba olwe-Government Gazette.
“Isingumthetho welizwe, okutsho lapho abantu abavotela khona, sokubhalwe kutsha. Okuqakathekileyo yikuthi uzulu abe kwazi ukuthi izinto seziguqukile bazi lapho abazavotela khona”
UMoyo ukhuthaze abamandla ezombusazwe ukuba athathe ithuba leli ukuba afundise abantu lapho abazavotela khona.
UMoyo uthi akula ngeyinye indlela ezakwenza ukuba ugwalo lolu luguqulwe; esithi isingumthetho welizwe kuminyaka elitshumi elandelayo.
Kulutshwana okungenziwa ngabantu ngaphandle kokuya emthethwandaba. Kuncane abangakwenza ukuba baguqule lokhu ngoba lokhu sakubeka kusisekelo sombuso welizwe”
Obona ngendaba zokhetho ku-Citizens Coalition for Change (CCC) uNkosikazi Ellen Shiriyedenga uthi ibandla lakhe kaliphiwanga ithuba lokungenisa izikhalazo zabo kule i-Report.
“Kakuhambanga ngemfanelo ngendlela ebe siyikhangelele. Thina njengebandla asiphiwanga ithuba lokuba sibone ukuba i-ZEC yasebenza njani. Besisithi i-ZEC izasitshela. Sesibona usungumthetho”
UMnu. Witness Dube owe-MDC-T uthi njengebandla basaxwayisisa ukuba ugwalo lolu luthini.
“Ugwalo lolu luzasinikeza uhlupho ngoba okunengi ebesifuna ukuba kulungisiswe akusalungiswanga. Sibona ingathi sizakuba lohlupho”
Kodwa abe-ZANU PF bathi balungele ukuya kukhetho besithi kabasoli lutho ngogwalo lolu. Lokhu kutshiwo lilungula lebandla leli uMnu. Munashe Mtutsa.
“Thina njengebandla sesilindela ukunqoba kukhetho kungelani lalokho okuphuma kugwalo lolu. Sivele silibandla elithandwa ngabantu”
Ukuphuma kogwalo lolu kutsho ukuba uMongameli Mnangagwa uselakho ukubeka ilanga lokuqutshwa kokhetho ukuze amabandla wonke ezombusazwe aqale ukuqinisa imikhankaso yokudinga usekelo lokuvotelwa.
Your browser doesn’t support HTML5
Udaba lweFinal Delimitation Report siluphiwa nguMlondolozi Ndlovu