Bulawayo..............
Amazwi endunduzo abe lokhu etheleka okukhalela imuli kaWayne Mgcini Ndhlovu owagwazwa wabulawa NgoMvulo ngomunye umfundi.
Indodana yakoNdlovu ibekwe ngolweSihlanu eMvutshwa Cemetery. Uhulumende nguye ohlawulele indleko zomngcwabo, kwathi amankampani athi eye-Nyaradzo leye-Moonlight Funeral Services, lawo ancedisa.
AbakoNyaradzo bancedise emngcwabeni kaWayne Ndlovu
Abafundi bezikolo ezehlukeneyo, ababalisi, abazali, abengatsha zikahulumende ezehlukeneyo, labezombusazwe bebethe gwaqa kunkonzo yokuvalelisana lomfundi weFounders High School, koBulawayo .
Umngcwabo kaWayne Ndlovu
Umphathintambo wakoBulawayo, uNkosikazi Judith Ncube nguye owethule amazwi endunduzo, emele uMongameli Emmerson Mnangagwa kanye lohulumende.
“UMongameli ukhala lathi Bulawayo. Uthe ngilazise ukuthi ulahlekelwe ngesinye sezitina sakhe sokwakha ilizwe”
UMsekeli ka-Mayor wakoBulawayo uMnu. Mlandu Ncube, ukhuthaze abasakhulayo ukuthi baqakathekise imfundo hatshi ukulwa.
“Thina sikhula lapha kwakufunda abamhlophe kuphela. Umaselisenzenje liyazeyisa kulabo ababengafuni ukuthi umuntu omnyama afunde lapha. Njalo libekwazi ukuthi ukuze lizofunda lapha, bakhona abachitha igazi labo. Qakathekisani ukufunda.”
Okugcizelelwe nguyise kamuyi uMnu. Sanelo Ndhlovu.
Umngcwabo kaWayne Ndlovu
“Lathi sakhula ikhona i-after School, kodwa kwakuliwa ngenqindi. Okwenu okokuthwalelana izikhali ngokunjani? Akuphele lamhlanje.”
Kwasekelwa ngumphathisikolo weFounders High School, lapho okukade kufunda khona uWayne, uNkosikazi Dorothea Moyo.
“Ngibuhlungu ngokufa kuka-Wayne. Ubengumfundi obelelekusasa elihle ngoba ubelamathalenta amanengi. Ngicela lihlukane lodlakela, kanye le-revenge engizwa kuthiwa lifuna ukuthenga.”
Isiphathamandla sogatsha lwezemfundo esibona ngokuhlolwa kwezikolo zakoBulawayo, uNkosikazi Loise Ngulube, uchasisa amanyathelo abawathathayo ukumelana lodlakela ezikolo.
“Sisebenza lamapholisa lezinye inhlanganiso ukumelana lodlakela ezikolo, njalo silandela uhlelo lukahulumende lokuhlomisa abafundi hatshi udlakela.”
Isikhulumi samapholisa koBulawayo u-lnspector Abednicho Ncube ukhuthaze abazali ukuba bondle abantwana okulembeko, babafundise inhlonipho.
“Siyazama ngazozonke indlela ukuba sivikele abafundi engozini, kodwa bazali ngiyacela ukuba liphe abantwana umthetho loba laye; libafundise indlela eqondileyo yokuphila.”
U-Wayne ubekwe namuhla ngemva kwemini enkulu eMvutshwa Cemetery, koBulawayo, kulandela umbuthano omkhulu wokumvalelisa. Zonke izikhulumi zemuli, abangane, abesikolo labazali bachaze umuyi njengojaha obekhaliphile, owayehlala ehlanzekile njalo elobuntu lothando.
Your browser doesn’t support HTML5
Udaba esiluphathelwe ngu-Annahstacia Ndlovu olomgcwabo ka-Wayne Mgcini Ndlovu owayefunda e-Founders High School, ogwazwe wafa ngoMvulo..m4a