Umkhokheli webandla leCCC uMnu Nelson Chamisa uthi ikhomishini ebona ngokuqhutshwa kokhetho, iZimbabwe Electoral Commission (ZEC), kumele iveze ugwalo lokuhlelwa kutsha kwezigaba zokuvotela, olwe-delimitation, elunikeze uMongameli Emmerson Mnangagwa ngeviki edluleyo.
Ugwalo lolu yilo oluzalandelwa lapho kudwetshwa kutsha izigaba zamalunga edale lePhalamende ama-constituencies, phambilini kokhetho uMnangagwa athi lulakho ukuqhutshwa ngoNtulikazi.
UChamisa uthi ugwalo lolu kumele lwethulwe emphakathini ukuze kobanakale ukuthi yilo kanye oluzadindwa nguhulumende kuGovernment gazette.
I-ZEC iphe uMnangagwa ugwalo lolu ngemva kokuluguqula kulandela ukukhonona kwamalunga amabandla wonke ephalamende esithi likhomishini yayehluleke ukwenza umsebenzi omuhle.
Sixoxe lowake waba ngumeli weNkayi South edale lephalamende olilunga leCCC uMnu Abednico Bhebhe, yena othi amqotho amazwe kaChamisa.
Ubexoxa ecingweni loNtungamili Nkomo weStudio 7 ekoBulawayo.
Isikhulumeli seZEC uMnu Jasper Mangwana walile ukuphendula imibuzo yeStudio 7 esithi sikhulume lomgcinisihlalo wekhomishini yakhe uNkosazana Priscillar Chigumba yena obengabambeki ecingweni.
Your browser doesn’t support HTML5
Ingxoxo loMnu. Abednicho Bhebhe.